ମିଳନ-ମାଧୁରୀ
ମିଳନ-ମାଧୁରୀ
ରୋମାଣ୍ଟିକ କବି ମାୟାଧର ମାନସିଂହ
କିଶୋରୀ ଗୋ ତବ ବକ୍ଷ -କମଳ
ମୋ ହୃଦ-କମଳ ପରେ
ରଖିଲ ଯା, ଟିକେ ରହ ଥିର ହୋଇ,
ଅନୁଭବ ତାହା କରେ ।
ପୁଲକିତ ଦେହ, ପୁଲକିତ ମନ
ଆଲୋକିତ ଅନ୍ତର,
କ୍ଷୁବ୍ଧ-ଶୋଣିତ,ଅଙ୍ଗେ ଅଙ୍ଗେ
ଆନନ୍ଦେ ଥର ଥର ।
କ୍ଷୁଦ୍ର ଜୀବନ ମହା ଜୀବନରେ
ଧୀରେ ଧୀରେ ଧୀରେ ମିଶେ
ଭାସିଯାଏ ଆମ ମିଳନ-ମାଧୁରୀ
ସୃଷ୍ଟିର ଦଶ ଦିଶେ ।
ଧରା ଜୀବନର ଜଡ ଅନୁଭବ
ଦେହ ମନୁ ଧୀରେ ତୁଟେ
ହୃଦୟ-ଦଳରୁ ସୌରଭ ସମ
ମହିମ୍ନ ସ୍ତବ ଫୁଟେ !
"ଜୟ ଈଶ୍ୱରି,ପତିତ ପାବନି,
ଲକ୍ଷ୍ମୀ ଗୋ, ଜୟ ନାରୀ,
ମଙ୍ଗଳ କର,ଜାଗ୍ରତ କର
କଲ୍ୟାଣ ତବ ଢାଳି ।
ତୋହର ପ୍ରଣୟ-ଉଷାର ପରଶେ
ମୋର ମନ ଶତଦଳ,
ବିକଶିତ ହେଉ ବସନ୍ତ ସମ
ସୌରଭେ ଟଳମଳ ।
ତୋହର ପାବନ ପୁଣ୍ୟ-ଶିଖାରେ
ନିର୍ମଳ କର ମତେ,
ଧରି ହାତ ମୋର, ଘେନିଯାଅ ଯହିଁ
ଚିତ୍ତ ତୋ ଯେଉଁ ପଥେ ।"
ସମାପ୍ତ