ପରିଚୟ

 କର୍ମକାଣ୍ଡ ପାଇଁ ମୃତକର ନାମ ପଚରା ଯାଉଥିଲା । କେହି ତାକୁ ରାଜୁ ବୋଉ କହୁଥିଲେ,ଆଉ କିଛି ରାମର ସ୍ତ୍ରୀ । ତା ପୂର୍ବରୁ ହୁଏତ ତାର ପରିଚୟ ଥିଲା ନଟବର ମହାନ୍ତିଙ୍କ ବୋହୁ । କିନ୍ତୁ ଏହା ଛଡା ଆଉ କିଛି ପରିଚୟ ବି ଥିଲା ତାର ଘନଶ୍ୟାମ ବାବୁ ଙ୍କ ଝିଅ ,ବସନ୍ତର ଭଉଣୀ ଆଉ ଓଃ ସତରେ ସେ କିଏ ଥିଲା??

  ତାହାର ଗୋଟିଏ ନାଁ ବି ଥିଲା ଅହଲ୍ୟା । କେଉଁ ଯୁଗରେ ଦେବୀଅହଲ୍ୟା ପତି ଅଭିଶାପରେ ପଥର ସାଜିଥିଲେ । ଆଉ ଏଇ ଅହଲ୍ୟା ମୃତ୍ୟ ଯାଏଁ ସେହି ଶାପ ହିଁ ତ ସହ୍ୟ କରୁଥିଲା ସେ ପଥର ହୋଇ । ଏଠି ନାରୀକୁ ପଦାଘାତ ,ବର୍ଜନ କରି ପୁରୁଷ ,ମର୍ଯ୍ୟାଦା ପୁରୁଷୋତ୍ତମରାମ ହୁଏ । ନାରୀକୁ ପ୍ରେମ କଲେ ତାହା ହୋଇଯାଏରାସଲୀଳା । ମାତା, ପିତା,ସ୍ତ୍ରୀ, ପୁତ୍ର ତ୍ୟାଗ କରି ଏଠି ପୁରୁଷ ବୁଦ୍ଧ ହୋଇଯାଏ ଆଉ ନିଜ କନ୍ୟା ସରସ୍ୱତୀକୁ ସ୍ତ୍ରୀ ସଜାଇ ଦେବତା ସାଜନ୍ତି ବ୍ରହ୍ମା । ହୁଏତ ସେତେବେଳେ ହିଁ ନିୟମ ସୃଷ୍ଟି ହୋଇଗଲା । ଝିଅ ମାନେ ଶାନ୍ତ ସରଳ ହେବା ଉଚିତ । ପାଟିକୁ ଚିପି ପିଇ ଦେବାକୁ ହୁଏ ସଂସାର ଜାକର ଗରଳ । ଚୁପଚାପ ବୀଣା ବଜାଇ ଚାଲିଲେ ସରସ୍ୱତୀ । ଯେଉଁ ହାତରେ ଖଡ୍ଗ ଧରି ପ୍ରତିବାଦ କରିବାର ଥିଲା ସେହି ହାତରେ ବୀଣା ଧରାଇ ଦିଆଗଲା । ସ୍ୱର୍ଗରେ ଅପ୍ସରା ମାନଙ୍କୁ ଶାରୀରିକ କଷ୍ଟ ସହି ଖୁସି କରେଇବାକୁ ହେଲା ଦେବତା ମାନଙ୍କୁ ।

  ଏହାହିଁ ଲେଖି ହୋଇଗଲା ସୃଷ୍ଟିର ନିୟମରେ ସେଦିନ ଯେ ଝିଅ ମାନେ ଶାନ୍ତରହିବା ଉଚିତ । ଅହଲ୍ୟା ବି ବଞ୍ଚିବାକୁ ଚାଂହୁଥିଲା ନିଜ ଭାଗର ଜୀବନ ଯେଉଁଦିନ ଘରେ ତା ପାଇଁ ପ୍ରସ୍ତାବ ଦେଖା ଆସିଲେ ଲୁଚି ଗଲା ସେ । କିନ୍ତୁ ଲୁଚି ପାରିଲା କି?? ଦିନେ ଘରୁ ବାହାରକୁ ବାହାରିଲା ବେଳେ ଶହେ ତାଗିଦ କରୁଥିବା ପରିବାର କେମିତି ତ ଠେଲିଦେଲେ ଏକ ଅଜଣା ବ୍ୟକ୍ତିର ଶଯ୍ୟା ଉପରକୁ ମଧ୍ୟରାତ୍ରରେ । ହଁ ଏଇଟା କାଳେ ବିବାହର ବନ୍ଧନ ଥିଲା । ଯେଉଁ ବନ୍ଧନର ଦଂଶନରେ ବାରମ୍ବାର ଜଳୁଥିଲା ଅହଲ୍ୟା । ପ୍ରସ୍ତାବ ଦେଖିବାକୁ ଆସିଥିବା ବ୍ୟକ୍ତି ମାନଙ୍କ ସାମ୍ନାକୁ ଥରେ ଶାଢ଼ୀ ଆଉ ଥରେ ଚୁଡ଼ିଦାର ପିନ୍ଧି ଆସିଲା । ଗୋଟି ଗୋଟି କରି ପ୍ରଶ୍ନର ଉତ୍ତର ଦେଲା ବେଳେ ତାକୁ ଶୁଳିରେ ଚଢିବା ଭଳି ଲାଗୁଥିଲା । ଶ୍ୱଶୁର ପ୍ରାକ୍ଟିକାଲ ଦେଖିବା ପାଇଁ ଅହଲ୍ୟା ହାତର ଚା ପିଇବାକୁ ଚାହିଁଲେ । ହୃଦୟରେ ଉଠିଥିବା କାଳ ବୈଶାଖୀକୁ ବର୍ଷି ବାକୁ ବି ସୁଯୋଗ ମିଳି ନଥିଲା ଏଠିରକ୍ତ ସତେ କି ସାଜିଥିଲେ ଶତ୍ରୁ ।

 ଚା'ରେ ଚାପତି ,ଚିନି,ଅଦା ସବୁ ମିଶି ଯାଉଥିଲା । ଠିକ୍ ସେମିତି ଅହଲ୍ୟାର ରାଗ,ରୁଷା, ମାନ ,ଅଭିମାନ ,କ୍ରୋଧ ଓ ପିଲାଳିଆମୀ ସବୁ ମିଳେଇ ଯାଉଥିଲା । ଅହଲ୍ୟାର ଭାଗ୍ୟର ଫଇସଲା ହୋଇଗଲା । ବିବାହ ପରେ ଯେଉଁ ମାନସିକ ଶାରୀରିକ ଉତ୍ପୀଡ଼ନର ସେ ସମ୍ମୁଖୀନ ହେଲା ତାକୁ ବି ସହ୍ୟ କରିବାକୁ ହେଲା,ବାରମ୍ବାର ଗୋଟିଏ ବ୍ୟକ୍ତି ଦ୍ୱାରା ବଳାତ୍କାରର ସମ୍ମୁଖୀନ ହେଲା ଗୋଟେ ଭଲ ଝିଅ ଆଉ ଭଲ ବୋହୁ ହେବା ପ୍ରଚେଷ୍ଟାରେ । ପାଟି ଖୋଲିବାର ଜୁ ନଥିଲା କାରଣ ସମାଜ ତାକୁ ଦେଇଥିଲା ସାମାଜିକ ଅଧିକାର । ଅହଲ୍ୟା ଯେମିତି ବିକ୍ରି ହୋଇଯାଇଥିଲା ବିନା ମୂଲ୍ୟରେ । ଯେବେ ଭଲ ଝିଅ ଆଉ ବୋହୁ ହେବାର ଅଭିନୟ ଆଗରେ ଭଲ ମାଆ ହେବାର ଅଭିନୟ ଭାରି ପଡିଲା ସେତେବେଳେ ଅହଲ୍ୟାର ବାକିଥିବା ଅଂଶ ମଧ୍ୟ ପଥର ପାଲଟି ଗଲା । ନିଜରକ୍ତ ଠାରୁ ମିଳିଥିବା ଉପହାର ତାକୁ ଅନେକ କଷ୍ଟ ଦେଲା କିନ୍ତୁ ଭୁଲ ତ ତାହାର ହିଁ ଥିଲା ଭଲ ସ୍ତ୍ରୀ ଆଉ ଭଲ ବୋହୁ ହେବା ଆଶାରେ ତାକୁ ଦୁଇ ଦୁଇଟି କନ୍ୟାକୁ ଗର୍ଭରୁ ହିଁ ଦଳି ମକଚି ସଫା କରିଦେବାକୁ ହେଲା । କିନ୍ତୁ ତଥାପି ସେ ସନ୍ତୁଷ୍ଟ ଥିଲା ଯେ ସେମାନଙ୍କୁ ଭଲ ଝିଅ ହେବାର ପରୀକ୍ଷା ଦେବାକୁ ହେଲାନି । ଶେଷରେ ହାରିଗଲା ସେ ନିଜେ ନିଜଠାରୁ କଣ ସତରେ ହୋଇପାରିଲା ସେ ?କଣ ତାର ପରିଚୟ?ଭଲ ଝିଅ,ଭଲ ବୋହୁ ,ଭଲ ସ୍ତ୍ରୀ ନା ଭଲ ମାଆ ???