ଲୋକେ କ'ଣ କହିବେ !

ପ୍ରକାଶ ବାବୁଙ୍କ ପରିବାର କହିଲେ;ସେ, ତାଙ୍କର ଉଚ୍ଚ ଶିକ୍ଷିତା ସରକାରୀ ଚାକିରିଆ ପତ୍ନୀ ଶ୍ରୀମତୀ ସୁରେଖା ଦେବୀ ଓ ଦୁଇ ଝିଅ-ପୁଅ। ପଡୋ଼ଶୀ ଗ୍ରାମର ଦାମ ବାବୁ ପ୍ରକାଶ ବାବୁଙ୍କର ଘନିଷ୍ଠ ବନ୍ଧୁ। ସମୟ ମିଳିଲେ ଉଭୟେ ପରସ୍ପର ସହିତ ସୁଖ-ଦୁ୍ଃଖ ହୁଅନ୍ତି। ସେଦିନ ରବିବାର ହୋଇଥାଏ। ଦାମ ବାବୁ ପ୍ରକାଶ ବାବୁଙ୍କ ଘରକୁ ବୁଲିବାକୁ ଆସିଥା'ନ୍ତି। ପିଲାମାନଙ୍କ କଥା ପଡ଼ୁ ପଡ଼ୁ ଦାମ ବାବୁ ତାଙ୍କ ପୁଅ କରିଥିବା ନୂଆ ସ୍ନାକ୍ସ୍ ଓ ଲେଡ଼ିଜ୍ କର୍ଣ୍ଣର୍ ଦୋକାନ ର ଚର୍ଚ୍ଚା ଆରମ୍ଭ କରିଦେଲେ। ପୁଣି ନୂଆ ନୂଆ ବ୍ୟବସାୟ କରୁଥିବାରୁ ଦାମ ବାବୁଙ୍କୁ ତାକୁ ସାହାଯ୍ୟ କରିବାକୁ ପଡ଼ୁଛି।

ଆଲୋଚନାକୁ ଆଗେଇ ନେଇ ପ୍ରକାଶ ବାବୁ କହିଲେ, "ଏଥର ପୁଅ ବାହାଘର କରି ଦେ। ବୋହୂ ପୁଅକୁ ଦୋକାନରେ ସାହାଯ୍ଯ କରିବ। " ପ୍ରକାଶ ବାବୁଙ୍କ ପାଟିରୁ କଥା ସରିଛି କି ନାହିଁ ଦାମ ବାବୁଙ୍କ ମୁହଁ ର ଭାବ ବଦଳାଇ କହିଲେ, "ବୋହୂ ଯଦି ଦୋକାନରେ ବସିବ;ତାହେଲେ ସେପଟେ ଘର କାମ କିଏ କରିବ? " ପ୍ରତିଉତ୍ତରରେ ପ୍ରକାଶ ବାବୁ କହିଲେ, "ଆରେ ସାଙ୍ଗ,ଘରକାମ ସରିଲା ପରେ ଅପରାହ୍ନରେ ତ ସେ ସାହାଯ୍ୟ କରିପାରିବ। ଆଜିକାଲି ତ ଝିଅମାନେ ସବୁ କାମରେ ଆଗୁଆ। " ପୁନଶ୍ଚ ଦାମ ବାବୁ ତାଙ୍କ କଥାରେ ନାକଟେକି କିଛି କହିବାକୁ ଉଦ୍ଯତ ହୁଅନ୍ତେ, ରୋଷେଇ ଘରୁ ସୁରେଖା ଦେବୀ ବାହାରି ଆସି କହିଲେ, "ଇଏ ତ ଆମର ଯୋଉ କଥା କୁହନ୍ତି;ଗାଁଆ ଗହଳିରେ ବୋହୂ ଦୋକାନରେ ବସିବା ଅସୁନ୍ଦର। ତା' ପରେ ଲୋକେ କ'ଣ କହିବେ! " ଅନ୍ଯ ପ୍ରକୋଷ୍ଠରେ ବିଶ୍ୱ ମହିଳା ଦିବସ ନିମନ୍ତେ ଫେମିନିଜିମ୍ ଉପରେ ଲମ୍ବା ଚଉଡ଼ା ଭାଷଣର ପ୍ରସ୍ତୁତି କରୁଥିବା କଲେଜ୍ ପଢୁଆ ଝିଅ ମନେ ମନେ ନିଜ ଉପରେ ହସୁଥିଲା। ସେ ହସ ଥିଲା ତାତ୍ସଲ୍ଯର ହସ, କ୍ରୋଧର ହସ, କୋହର ହସ......