କୁଆ ଏବଂ ପେଚା ମାନଙ୍କ ମଧ୍ୟରେ ଶତ୍

ମେଘବର୍ଣ୍ଣ ସ୍ଥିରଜୀବିଙ୍କୁ ପଚାରିଲେ ମହାଶୟ! କୁଆ ଏବଂ ପେଚାମାନଙ୍କର ମଧ୍ୟରେ ଏପରି ଶତ୍ରୁତା ହେଲା କାହିଁକି? ସ୍ଥିରଜୀବି ଏହି ସଂପର୍କରେ ମେଘବର୍ଣ୍ଣଙ୍କୁ ଏକ କାହାଣୀ କହିବାକୁ ଆରମ୍ଭ କଲେ । ବହୁ ପୁରା କାଳର କଥା । ଗୋଟିଏ ଜଂଗଲରେ ବାସ କରୁଥିବା ହଂସ, ଶୁଆ, ବଗ, କୋଇଲି, ପେଚା, ମୟୂର, ପାରା, କୁକୁଡା, କପୋତ ପ୍ରଭୃତି ପକ୍ଷୀମାନେ ଏକ ସଭା କଲେ । ସେମାନଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଆଲୋଚନା ଚାଲିଲା । ସେମାନଙ୍କ ମଧ୍ୟରୁ ଜଣେ କହିଲା, ‘ଗରୁଡ ହେଉଛନ୍ତି ଆମ୍ଭମାନଙ୍କର ରାଜା’। କିନ୍ତୁ ସେ ଯେଉଁ ଦିନଠାରୁ ଭଗବାନଙ୍କର ବାହନ ରୂପେ ନିଯୁକ୍ତ ହେଲେ, ସେହି ଦିନଠାରୁ ସେ ଆମ୍ଭମାନଙ୍କର ଅଭାବ ଅସୁବିଧା କଥା ବୁଝିପାରୁ ନାହାନ୍ତି । କୁହାଯାଇଛି, ‘ବିଦ୍ୟାଦାନ ନ କରୁଥିବା ଗୁରୁ, କର୍ମକାଣ୍ଡ ଜାଣିନଥିବା ବ୍ରାହ୍ମଣ ପୁରୋହିତ, କର୍କଶ ବଚନ କହୁଥିବା ପତ୍ନୀ, ପ୍ରଜାମାନଙ୍କର ରକ୍ଷଣାବେକ୍ଷଣ କରୁନଥିବା ରାଜାଙ୍କୁ ତ୍ୟାଗ କରିବା ଉଚିତ୍ । ତେଣୁ ଆମ୍ଭମାନଙ୍କୁ ଏ ସଂପର୍କରେ ଚିନ୍ତାକରି, ଏକ ନୂତନ ରାଜାଙ୍କୁ ନିଯକ୍ତ କରିବାକୁ ପଡିବ ।

ଏହି କଥା ଶୁଣି ପକ୍ଷୀମାନେ ପରସ୍ପର ମୁହଁ ଚାହାଁ ଚାହିଁ ହେଲେ । ସେମାନଙ୍କ ମନରେ ଏକ ଚିନ୍ତା ପଶିଲା । ‘କିଏ ହେବ ସେମାନଙ୍କର ରାଜା’? ଶେଷରେ ସମସ୍ତେ ମନସ୍ଥ କଲେ, ପେଚା ମହାଶୟଙ୍କୁ ରାଜା ରୂପେ ନିଯୁକ୍ତି କରିବା । ଶେଷରେ ପକ୍ଷୀମାନେ ପେଚା ମହାରାଜଙ୍କୁ ସିଂହାସନ ଆରୋହଣ କରାଇବା ପାଇଁ ଏକ ଆୟୋଜନରେ ଲାଗି ପଡିଲେ । ସିଂହାସନଟି ସୁନ୍ଦର ରୂପେ ସଜା ଯାଇଥିଲା । ଏକ ବାଘଛାଲ ସିଂହାସନ ଉପରେ ପଡିଥିଲା । ପକ୍ଷୀମାନେ ଭିନ୍ନ ଭିନ୍ନ ପ୍ରକାରର ବାଦ୍ୟ ବଜାଇବାରେ ଲାଗି ପଡିଲେ । ଠିକ୍ ଏହି ସମୟରେ କୁଆ ଆସି ସେଠାରେ ପହଁଚିଗଲା ଏବଂ କହିଲା “କଣ ପାଇଁ ଏଠାରେ ସମସ୍ତେ ଏକଜୁଟ୍ ହୋଇଛ? ସମସ୍ତେ ମଧ୍ୟ ଖୁସି ଥିଲାପରି ଜଣା ପଡୁଛ । କଣ ହୋଇଛି ମୋତେ କୁହ”? “ଏହାପରେ ଜଣେ ପକ୍ଷୀ ବାହାରି ପଡି କହିଲା, ଆମ୍ଭମାନଙ୍କର କେହି ସର୍ବୋମୟ କର୍ତା ନଥିଲେ । ତେଣୁ ଆମ୍ଭେମାନେ ସମସ୍ତେ ପେଚା ମହାଶୟଙ୍କୁ ଆମର ରାଜା ରୂପେ ନିର୍ବାଚିତ କଲୁ । ତେଣୁ ତୁମେଯଥାଶୀଘ୍ର ତୁମର ମତାମତ ପ୍ରଦାନ କର ।”

କୁଆ ନିଜର ମତାମତ ପ୍ରଦାନ କରିବାକୁ ଯାଇ କହିଲା, ‘ମୁଁ ତୁମ୍ଭମାନଙ୍କ ସହିତ ଏକମତ ନୁହେଁ । ତୁମ୍ଭେମାନେ କିପରି ଏକ ଅସୁନ୍ଦର ଏବଂ ଦିନାନ୍ଧ ପକ୍ଷୀକୁ ରାଜା ରୂପେ ନିର୍ବାଚିତ କଲ? ଆମ୍ଭମାନଙ୍କ ମଧ୍ୟରେ, ମୟୂର, କୋଇଲି, ହଂସ, ସାରସ, ପାରା ଇତ୍ୟାଦି ସୁନ୍ଦର ପକ୍ଷୀମାନେ ଥାଉ ଥାଉ ତୁମ୍ଭେମାନେ କିପରି ଏହି କାର୍ଯ୍ୟ କଲ, ମୋତେ ଆଶ୍ଚର୍ଯ୍ୟ ଲାଗୁଛି । ମୁଁ ତୁମ୍ଭମାନଙ୍କର ଏହି କାର୍ଯ୍ୟରେ ଏକମତ ନୁହେଁ । ତା’ର ଆଖି ଯୋଡିକ ଉଚ୍ଚ, ଏବଂ ନାକଟି ବଙ୍କା । ଯେତେବେଳେ ସେ ରାଗିଯିବ ପ୍ରକୃତରେ ସେ ଭୟଙ୍କର ଦେଖାଯିବ । ଗରୁଡଙ୍କ ପରି ରାଜା ଥାଉଁ ଥାଉଁ ଏହି ଅସୁନ୍ଦର ପକ୍ଷୀଟିକୁ ରାଜା କରି ଭୁଲ୍ କର ନାହିଁ । ଜଣେ ରାଜା ଅଛନ୍ତି, ତାଙ୍କ ଉପସ୍ଥିତିରେ ଅନ୍ୟ ଜଣକୁ ରାଜା ରୂପେ ବାଛ ନାହିଁ । ଗରୁଡଙ୍କ ନାମ ଶୁଣିବା ମାତ୍ରକେ ଆମ୍ଭମାନଙ୍କର ଶତ୍ରୁ ମଧ୍ୟ ଭୟଭୀତ ହୋଇପଡେ ।’ ଏହା କହି କୁଆ ଏକ କାହାଣୀ କହିବାକୁ ଆରମ୍ଭ କଲା ।