ଚକୋଲେଟ

ବିରକ୍ତ ହୋଇ ଗଲାଣି ରୀତା । ପିଙ୍କିର ସବୁବେଳେ ଯେଉଁ ଝୁଙ୍କ । କେବଳ ଚକୋଲେଟ ଖାଇବ।ଯେତେ ମନା କଲେ ମଧ୍ୟ ସେ ନଛୋଡ଼ ବନ୍ଧା । କୁଆଡେ ବୁଲି ଗଲେ ଯେପରି ସେଇୟା ମାଗିବ କେହି ଘରକୁ ଆସିଲେ ମଧ୍ୟ କେବଳ ସେଇ ଚକୋଲେଟ ର ଆଗ୍ରହ । ଖେଳନା କି ନୂଆ ପୋଷାକ ଦେଖିଲେ ଖୁସି ହୁଏନି ପିଙ୍କି । କେବଳ ଚକୋଲେଟ ଦେଖିଲେ ଡେଇଁ ଉଠେ ଖୁସିରେ ।

ସମିତ ବୁଝେଇ ଦିଅନ୍ତି । " ଛୋଟ ପିଲାଟା । ଚକୋଲେଟ ଖାଇବନି ତ ଆଉ କଣ ତୁମେ ଆଉ ମୁଁ ଖାଇବା?"କିନ୍ତୁ ରୀତା ତାଙ୍କୁ ବୁଝେଇ ପାରେନି ସେ କାହିଁକି ଏତେ ବିରକ୍ତ ହୁଏ ।

ଅନେକ ଥର ବୁଝାଇଛି ରୀତା ଚକୋଲେଟ ଖାଇଲେ କିପରି ଦାନ୍ତରେ ପୋକ ଲାଗିଯାଏ । ତା ପରେ କିପରି ଡାକ୍ତର ତାକୁ ସଫା କରନ୍ତି ଆଉ କେତେ କଷ୍ଟ ହୁଏ । ସଜ ଫୁଲଟି ପରି ହସିଦିଏ ପିଙ୍କି । "ପୋକ ଲାଗିଲେ ଦେଖିବା । "ଆଉ ରୀତାର ପ୍ରତିକ୍ରିୟା ପାଇଁ ଅପେକ୍ଷା ନ କରି ଦୋୖଡି ଚାଲିଯାଏ।

ରୀତା ଏଇୟା ମଧ୍ୟ ଡରେଇଛି ଆଜିକାଲି କିପରି ଚକୋଲେଟ ଦେଇ ପିଲାଚୋର ମାନେ ପିଲା ମାନଙ୍କୁ ଚୋରେଇ ନେଇ ଯାଆନ୍ତି । ପିଙ୍କି ପୁଣି ହସିଦେଇ କହେ"ମାମା !ତମେ କଣ ଜାଣିନ କି ମୁଁ ଅଜଣା ଲୋକଙ୍କ ହାତରୁ କିଛି ନିଏନି । !!??"

    "ଜାଣିଛୁ ନା ଚକୋଲେଟ ଖାଇଲେ ପେଟ କାଟେ?"ହସିଦିଏ ପିଙ୍କି । "ମୋର କାଟୁ ତା ପରେ ଛାଡ଼ିଦେବି । "ଆଉ ପୁଣି ଦୋୖଡି ଚାଲିଯାଏ ।

ହଁ । ଏଇଟା ଅବଶ୍ୟ ଖୁସିର କଥା ଯେ ପିଙ୍କି କେବେ କୌଣସି ଅଜଣା ବ୍ୟକ୍ତି ହାତରୁ କିଛି ଖାଇବା ଜିନିଷ ନିଏନି । ସେ ଚକୋଲେଟ ହେଲେ ମଧ୍ୟ ଫେରାଇ ଦିଏ।ତଥାପି ଏତେ ଚକୋଲେଟ ଖାଇବା କଣ ଭଲ କଥା?ତା ଛଡା ଆଜିକାଲି ଯେପରି କମ୍ ବୟସରେ କେତେ ରୋଗ । !!ଜିଭକୁ କାମୁଡି ପକେଇଲା ରୀତା । . ପାଗଳୀଙ୍କ ପରି କଣ ନାହିଁ କଣ ଭାବି ଚାଲିଛି ଯେ ।

ସେଦିନ ରୀତା ବହୁତ କାମରେ ବ୍ୟସ୍ତ ଥିଲା।ତା ଛଡା ସକାଳୁ ଉପବାସ । ଦୈବୀକୃତ ନୁହେଁ ମନୁଷ୍ୟକୃତ । ମାନେ ସମିତଙ୍କ ଦୁଇ ଜଣ ସାଙ୍ଗ ଘରକୁ ଆସିଥିଲେ।ତେଣୁ ଅତିଥି ଚର୍ଚ୍ଚା । ଅବଶ୍ୟ ଏସବୁ ସାଧାରଣ କଥା।ସମିତ କହିଲେ"ତୁମେ ଖାଇ ସାରି ଟିକେ ଥକ୍କା ନିଅ । ମୁଁ ପୀଙ୍କିକୁ ବୁଲେଇ ଆଣୁଛି । "ଏତେ ବ୍ୟସ୍ତତା ଭିତରେ ସେ କାଲିଠୁ ପିଙ୍କି ସହିତ କଥା ମଧ୍ୟ ହୋଇ ପାରି ନାହିଁ ।

ରୀତା ଶାନ୍ତିରେ ନିଶ୍ୱାସ ମାରି ଖାଇବା ପର୍ବ ସମାପ୍ତ କରି ଟିକେ ଆରାମ କରିବାକୁ ଲାଗିଲା।କିଛି ସମୟ ମଧ୍ୟରେ ବାପା ଝିଅ ଫେରି ଆସିଲେ।ଘରକୁ ଆସି ପିଙ୍କି ସବୁଦିନ ପରି ଡେଇଁ ଡେଇଁ ନ ଯାଇ ଚୁପଚାପ୍ ତା ରୁମକୁ ଚାଲିଗଲା।ରୀତା ପଚାରିବା ଆଗରୁ ସମିତ କହିଲେ"ପିଙ୍କିର କଣ ହେଇଛି । ?ସେ ଆଜି ଚକୋଲେଟ ଖାଇବାକୁ ମନା କରିଦେଲା । "ଚମକି ପଡ଼ିଲା ରୀତା । .ଏକ ନିଃଶ୍ୱାସରେ ପିଙ୍କି ରୁମକୁ ଯାଇ ଦେଖିଲା ବେଳେ ପିଙ୍କି ଆଖିରେ ଆଖିଏ ଲୁହ । .

ମା କୁ ଦେଖି ପିଙ୍କି କଇଁ କଇଁ ହୋଇ କାନ୍ଦି ଉଠିଲା ଆଉ କହିଲା । "ମାମା ।  ସ୍କୁଲ୍ ବସ୍ ଡ୍ରାଇଭର ଅଙ୍କଲ ଆମ ଦୁଇ ସାଙ୍ଗକୁ କେତେ ଥର ଚକୋଲେଟ ଦିଅନ୍ତି । ମୋତେ ଆଉ ପ୍ରୀତି କୁ।ମୁଁ ଆଉ କାହା ହାତରୁ କିଛି ନିଏନି ନା ମନା କରିଦିଏ । .ସେ ଖାଇଦିଏ।କାଲି ମୁଁ ଖେଳୁ ଖେଳୁ ସ୍କୁଲ୍ ପଛ ପଡିଆକୁ ବଲ୍ ଆଣିବାକୁ ଚାଲିଗଲି । ଆଉ ଦେଖିଲି । ପ୍ରୀତି ତଳେ ଶୋଇଛି । ତା ପାଖକୁ ଗଲା ବେଳେ ତା ମୁହଁ ସାରା ଖଣ୍ଡିଆ ଦେଖିକି ଡରିଗଲି । ପ୍ରୀତି କାନ୍ଦୁଥିଲା ଆଉ ତା ହାତରେ ଚକୋଲେଟ କଭର୍ ଧରିଥିଲା । ମୋତେ ଡର ଲାଗିଲା । ମୁଁ ଦୋୖଡି ଆସିଗଲି । କିନ୍ତୁ କଣ ହେଲା ମାମା ପ୍ରୀତିର??ଚକୋଲେଟ ଖାଇକି ଖଣ୍ଡିଆ ହେଇଗଲା କି ତା ମୁଁହ?ଚକୋଲେଟ ଖାଇଲେ ପୋକ ହେବ କହିଛ । ପେଟ ଖରାପ୍ ହେବ କହିଛ । କିଏ ନେଇଯିବ କହିଛ । ହେଲେ ମୁହଁ ଖଣ୍ଡିଆ ହେବ କାହିଁକି କହିନ?ମୁଁ ଡିଶାଇଡ୍ କରିଛି । ଆଉ କେବେ ଚକୋଲେଟ ଖାଇବିନି । କିନ୍ତୁ ତୁମେ ମୋତେ ଏ କଥା କାହିଁକି କହି ନ ଥିଲ ମାମା । !!??

ପିଙ୍କି ଅଭିମାନରେ କାନ୍ଦି ତା ମାମା କୁ କୁଣ୍ଢେଇ ଧରିଥିଲା । କିନ୍ତୁ ରୀତା ଏକ ଅଜଣା ଭୟ ଆଶଙ୍କା ଆଉ ଘୃଣା ରେ ଥରି ଉଠୁଥିଲା । କଣ ବୁଝାଇବ ସେ ପିଙ୍କି କୁ?? ଅବଶ୍ୟ ଆଜି ସେ ଖୁସି ହେଉଥିଲା ପିଙ୍କି ଚକୋଲେଟ ଛାଡିଛି ବୋଲି । କିନ୍ତୁ ଚକୋଲେଟ ବିନା ମଧ୍ୟ ସେ ସୁରକ୍ଷିତ ତ । .!!??କବାଟ ପାଖରେ ରହି ସବୁ ଶୁଣୁଥିବା ସମିତ ମଧ୍ୟ ଆଖି ପୋଛି ଏହି ପ୍ରଶ୍ନର ଉତ୍ତର ଖୋଜୁଥିଲେ ବୋଧେ । .!!??