ବିଦ୍ୟାଧର ଚମ୍ପୂ

ରାଗ -ଝଁଝୋଟ, ତାଳ -ଆଠତାଳି

      ଲ ------

ଲୀଳାମୟୀ ନଉଲିବାଳା ତୁ ରହରେ

ଲବେକୃପା କର ଅଛି ବିରହରେ

ଲଳନା ବର ଏଥର

କରି ଗଳାହାର ତୋର

ଲମ୍ବାଇ ଦେ କଣ୍ଠେ ତୁହି ଆଦରରେ ।

ଲଳିତେ ତମାଳ ଶ୍ୟାମ

ଇନ୍ଦ୍ର ନୀଳମଣି ରାମ

ଲଳନ୍ତିକା କରକିଣା କିଙ୍କରରେ ।

ଲାବଣ୍ୟମୟୀ ସୁନ୍ଦରୀ

ଲୀଳାବିଳାସିନୀ ପରୀ

ଲବେଦୟାକରକଳା ଭ୍ରମରରେ ।

ଲମ୍ପଟ ନାଗରୀ ମୁହିଁ

ତୋ ଲପନ ଶୋଭା ଚାହିଁ

ସୁଧାବୋଲି ପାନକଲି ତୋହରରେ

ଲାଘବ କର ଏଥର

ସ୍ମରପୀଡା ଅନ୍ତରର

ଘାରୁଅଛି ତୋହପ୍ରୀତି ଶରୀର ରେ ।

ଲାଜକୋଳି ଲତା ରାଇ

ବିଦ୍ୟାଧର ଲେଖେ ଧ୍ୟାୟୀ

କହ୍ନାଇକୁ ଭଜ ତୁ ଅହରହରେ।