ଟୋଣ୍ଟି ଟୋଣ୍ଟି

ଅନ୍ଧାରରେ ଆସି ଅନ୍ଧାରେ ଫେରିଲା

ସମସ୍ତଙ୍କୁ ଦେଲା ଘାଣ୍ଟି ଘୁଣ୍ଟି 

ଥିଲାବାଲା ଙ୍କର ଅଣ୍ଟା ଢିଲା ହେଲା

 ଶୁଖିଲା ଗରିବ ତଣ୍ଟି

ଟୋଣ୍ଟି ଟୋଣ୍ଟି ।

ଏରୁଣ୍ଡି ଡେଇଁଲେ ତୁଣ୍ଡି ନବାନ୍ଧିଲେ

ବାଟରେ ଗଣିଲୁ ତଣ୍ଡ

ନିର୍ଦ୍ଦୟ କରୋନା କଲା ବାଟବଣା

ନିଇତି ଖାଇଲା ମୁଣ୍ଡ

ଦାଦନଙ୍କ ଦୁଃଖ ବଳେଇ ପଡିଲା

ବାଟରେ ମରିଲେ ଝୁଣ୍ଟି

ଟୋଣ୍ଟି ଟୋଣ୍ଟି ।

ବହାଘର ସବୁ ଅଟକି ରହିଲା

ମଣ୍ଡପେ ଝୁଲିଲା ତାଲା

କାମ ପାଇଲେନି କବି କଳାକାର

ଡିଜେ ଆଉ ବାଜାବାଲା

 ପ୍ରେମିକ ପ୍ରେମିକା ଛଟପଟ ହେଲେ

ନହେବାରୁ ଭେଟାଭେଟି

ଟୋଣ୍ଟି ଟୋଣ୍ଟି ।

ଗମ୍ଭୀରା ଭିତରେ ଦିଅଁ ଗୃହବନ୍ଦୀ

ଦେଉଳ ଦୁଆର ମନା

ଭକତଙ୍କ ଆଉ ଦେଖା ମିଳିଲାନି

ଉପାସ ରହିଲେ ନନା 

କଟକଣା ପାଇଁ ପୂଜା ମଜା ସବୁ

ଫିକା ହୋଇଗଲା ଏଠି

ଟୋଣ୍ଟି ଟୋଣ୍ଟି ।

ପିଲାମାନଙ୍କର ପାଠ ହେଲା ମାରା

ବରଷଟା ଗଲା ବିତି

ହେଲାନି ପରୀକ୍ଷା ଅନଲାଇନ ଶିକ୍ଷା

ଭଲପିଲାଙ୍କର କ୍ଷତି

ଚଗଲା ମାନଙ୍କ ମନ ଭାରି ଖୁସି

ପାଠଶାଳା ହେଲା ଛୁଟି

ଟୋଣ୍ଟି ଟୋଣ୍ଟି ।

ଦରମା କାଟିଲେ କମ୍ପାନୀ ମାନେତ

କର୍ମଚାରୀ ଗଲେ ମରି

ଅଧା ଦରମାରେ ଦହଗଞ୍ଜ ହେଲେ

ପିଲା ପରିବାର ଧରି

ସରକାରୀ ବାବୁ ଘରେରହି ସବୁ

ଆରାମରେ କଲେ ଖଟି

ଟୋଣ୍ଟି ଟୋଣ୍ଟି ।

ଏକୋଇଶ ଆସି ବାଣ୍ଟିଲାଣି ଖୁସି

ଠାକୁର ଦେଲେଣି ଦେଖା

ଏଥର ଜମିବ ପୂହ୍ନେଇ ପରବ

ସିନେହ ଶରଧା ମଖା

ବାହାଘର ହେବ ରୋଷଣୀ ଜମିବ

କଟକଣା ଗଲା ହଟି

ଟୋଣ୍ଟି ଟୋଣ୍ଟି ।

କରୋନା ର ବାଟ ହୋଇବ ଆକଟ

ମିଳିଲାଣି ଏବେ ଟୀକା

ଟୀକା ନେଲାପରେ ରହିବନି ଆଉ

ମହାମାରୀ ପାଇଁ ଶଙ୍କା

କରୋନା କୋପରୁ ମୁକତି ପାଇଁକି

ବାଟ ଆସିଲାଣି ଫିଟି

ଟୋଣ୍ଟି ଟୋଣ୍ଟି ।