ସ୍ମୃତି ଏକ ପ୍ରିୟା
ସ୍ମୃତି ଏକ ପ୍ରିୟା
ଜୀବନ ର ବିଫଳତା ପୁଣି ତା ପର ର ନିସଙ୍ଗତା
ସମ୍ପର୍କ ର ଛିଣ୍ଡା ଅଖା ଆଉ ଝରିପଡୁଥିବା ଜହ୍ନମାମୁଁ ମାନେ
ପ୍ରେମିକାର ମିଠା ହସ ଖୁବ ବେଶୀ ମନେ ପଡେ
ଝର ଝର ଝରିଯାଏ ଗାଁ କେନାଲର ସବୁ ପାଣି
ଆର ଗାଁ ଝାମୁ ଚଲା ଆଙ୍କିଦିଏ ଭୟର ଲକ୍ଷ୍ମଣଗାର
ଆଇ ମା ର ଅସୁରୁଣୀ ଆଜି ବୋଧେ ସତରେ ହାଜର
କିଏ ଯେ ସେ ରଜାପୁଅ କାହିଁ ତାର ଧଳା ଘୋଡା
ଏଠି ଅନେକ ଧୁଆଁ ଧୂସର ହେଲେ ଦିଶୁନାହିଁ ଧୁଳିଆ ବାବା ।
ଭଲ ପାଠ, କଳା ଘୋଡା ----ପୁଣିଥରେ ମଧୁବାବୁ ଆସନ୍ତେକି
ପଚାରନ୍ତି ଫୁରସତ ନେଇ ଉତ୍କଳ ଟ୍ୟାନେରୀର ବାଟ ତାଙ୍କୁ ।
ଚିକମିକ ରଙ୍ଗମଞ୍ଚ ଅବିରର ହୋଲିଖେଳ
ପୁନେଇର ସଞ୍ଜ ରେ ସେ ଚାନ୍ଦ ଖିଆ ଓଷା
ଭିକୁସେଟ ର ଶାଗୁଣା ଆଉ ତାର ଡେଣା ମେଲା ଯାତ୍ରା
ଜାଗର ଉପାସ ଦିନ ଲୁଚିଲୁଚି ବୋହୁଚୋରି ଖେଳ
ଶବ୍ଦହୀନ ଗୋଧୂଳି ବି ଲାଗେ ଅତି ନିଜର
ଅଚିହ୍ନାର ସ୍ନେହ ସବୁ ଗୀତ ଗାଏ ଆତ୍ମୀୟତାର
ଚିହ୍ନାମାନେ ଲେଖୁଥାନ୍ତି କାହାଣୀ ମୋ ଠିକ୍ ଭୁଲ୍ ର
ତଥାପି ନିରୀକ୍ଷି ଦେଖେ ସ୍ମୃତି ସବୁ ଅତୀତର ।