ଶିତେଇ ସଞ୍ଜଟି

ଶିତେଇ ସଞ୍ଜଟି ଫୁଲେଇ ଲାଜେଇ

          ଭିଡ଼ି ନେଲା ପଛଆଡ଼ୁ

ପଣତ ଉହାଡ଼େ ଲୁଚିଲେ ସୁରୁଜ

    :     ରାତି ଆସେ ବାଡ଼କଡୁ ।

କୁହୁଡି ସଂଜଟି ଧୂଆଁ ଧୂଆଁ କରି

         ନଇଁ ଆସେ କ୍ଷେତମାଳୁ

ଘର ପଛ ଆଗ ଫୁଲର ସରାଗ

        ସୁବାସିତ ଗଛଫାଳୁ ।

କୋହଲା ସଂଜଟି ବଇରୀ ସାଜିଛି

       ହେମାଳ ଆପାଦ ମସ୍ତକ

ସଂଜବତି ଧରି ଚାଲେ ଡରି ଥରି

        ହାତ ବଳୟେ ଅଟକ ।

ଗୋଧୂଳୀ ସଂଜଟି ରୋଷିଛି ରାଗିଛି

         ଶ୍ରୀଅଙ୍ଗେ ରାଗ ଝଙ୍କାର

କାଲୁଆ ପବନ ଛୁଏଁ ଛାତି କର୍ଣ୍ଣ 

       ଦମନ ବାଣେ ଜର୍ଜର ।

ମୁକୁଳା ସଂଜଟି ଭାରୀ ଫଟଫଟି

         କଂପନ ଆଣେ ବୟସୀ

ହାତ ଶଙ୍କିଯାଏ ଛୁଇଁ ପାଣି ଧିରେ

         ମୁଷ୍ଟିବନ୍ଧ ହସ୍ତ ବେସି ।

କୁଆଁରୀ ସଂଜଟି ଭାରି ଲାଜକୁଳି

         ଫୁଲ ଚାଦର କୋଳେ

ଅଧା ହସ୍ତ କାଢି କର୍ମ କରେ ବଢି

        ଗୁରୁବାର ମୁରୁଜ ତୋଳେ ।

ସୁନ୍ଦରୀ ସଂଜଟି ଗୋଳେଇ ଚକଟି

          ଅଙ୍ଗ ଭଙ୍ଗୀ ରମଣୀୟା

ପାଶେ ବସି ବାସି ମନରେ ମନାସୀ

       ଉଦାସୀ ପ୍ରେୟସୀ ପ୍ରୀୟ। ।

ବଧୂଲି ସଂଜଟି ନହୁଲି ମହୁଲି

        ମାଦକ ଭରେ ଯୌବନେ

ଚାରିକାନ୍ଥ ଘରେ ମରେ ଝୁରେ ସଖୀ

        ଏକାନ୍ତେ କାନ୍ତ ବିହୁନେ ।

ବେପଥୁ ସଂଜଟି ଗୁମାନେ ଗୋପନେ

         ବଳକା ଆୟୁଷ ସାରେ

ମାନ ଅଭିମାନେ ଶୟନେ ସ୍ୱପନେ

       ବିଳାପେ ରୋଦନେ ମରେ ।

ବୟସୀ ସଞ୍ଜଟି ଗୁମୁରି ସୁମରି

       ସପନ ଗଡେଇ ଦିଏ

ଜୀବନ ସଳିତା ମିଞ୍ଜି ମିଞ୍ଜି ହୋଇ

     ଗୋପତେ ହୃଦୟ ମୋହେ ।