ରଜ ଦୋଳି
ରଜ ଦୋଳି
ସୁନ୍ଦର ସକାଳେ ଉଇଁ ଆସେ ରବି
ଧରିଛି ନୂତନ ଆଶା କିରଣ,
ରଜର ମଉଜ ଆରମ୍ଭ ହେଉଛି
ଅଳତା ଲାଗିଛି ସଭି ଚରଣ ।
ଛକ ବଜାରରେ ବର ଗଛ ତଳେ
ଚାଲିଛି ତାସ ଲୁଡୁର ଖେଳ,
ଝିଅ ପିଲା ମାନେ ବାଡ଼ି ବଗିଚାରେ
ଖେଳନ୍ତି ବୋହୂ ବାଗୁଡ଼ି ହୋଇଣ ମେଳ ।
ଘରେ ଘରେ ଆମ୍ବ ପଣସ ସମ୍ଭାର
ପିଠା ମିଠା ପାନ ଥୁଆ ହୋଇଛି,
ବନ୍ଧୁ ବାନ୍ଧବରେ ଘର ଦ୍ବାର ପୂର୍ଣ୍ଣ
ହସ ମଜାର ଆସର ଜମିଛି ।
କୁନି କୁନି ପାଦ ପଡ଼ି ଉଠି ଯାଏ
ଧରିତ୍ରୀ ମାତା ତ ରଜସ୍ୱଳା ହୁଏ,
ପୋଡ଼ ପିଠା ପାଖେ ଜଗି ବସିଥାଏ,
ଡାକିଦେଲେ ସିଏ ଓଠେ ହସିଦିଏ ।
ଦୋଳି ବନ୍ଧା ହୋଇଛି ଗଛ ଡାଳରେ
ସେଥିରେ ସଜ୍ଜିତ ଫୁଲର ମାଳା,
ଝିଅ ମାନେ ଯାଇ ଦୋଳି ଖେଳୁଛନ୍ତି
ସଭିଙ୍କ ପାଇଁ ଏ ଖୁସିର ବେଳା ।
ରାଗ, ହିଂସା ଛାଡ଼ି ଈର୍ଷା ମନୁ କାଢ଼ି
ଆସରେ ଭଉଣୀ ଭାଇ,
ଆମର ରଜରେ ଖୁସି ମନାଇବା
ଖାଇବା ପିଠା ମିଠା ବାଢ଼ି ।