କିଏ ମୁଁ ଆସିଛି ଧରା
କିଏ ମୁଁ ଆସିଛି ଧରା
କିଏ ମୁଁ ଆସିଛି ଧରା କେଉଁଠାରୁ କାହିଁପାଇଁ
ବାରବାର ପୁଚ୍ଛି ମନ କେଉଁ ଲାଭ ଅବା ଥାଇ
ସିଏ କି ଦେବ ଉତ୍ତର ଅଜ୍ଞାନତା ଗୁଣ ବହି
ହେ ପ୍ରଭୁ ସୃଷ୍ଟି କରତା ଦିଅ ମୋ କାନେ ବତାଇ ।
ଅଜ୍ଞାନାନ୍ଧକାରେ ନିତିନିତି ଭ୍ରମେ ଭ୍ରମୁଥାଇ
କେଉଁଦିନ ଜ୍ଞାନଚକ୍ଷୁ ମୋର ଦେବ ତୁମେ ଫେଇ
ପାଇ ମୁଁ ସଠିକ ପଥ ମନକୁ ମୋ ନେବି ଧାଇଁ
କରୁଣାବାରି ଝରିବ କି ଏ ଅକିଞ୍ଚନ ପାଇଁ ?
ବୃଥା ମାୟାମୋହେ ଭ୍ରମି ଭାବେ କିଛି ଲାଭନାହିଁ
ପଥକୁ କି ସଖା ହେବେ ମୋହର ଆତ୍ମୀୟେ କେହି
ସତ-ମିଛ ଦୁନିଆରେ ସଭିଏଁ ସ୍ବାର୍ଥରେ ବାଇ
ନୟନ ମୋ ଦେଖୁଥାଏ ପୁଣି ଅନୁଭବୁଥାଇ ।
ଉଚିତ କି ଅନୁଚିତ କିସ ନିତି କରୁଥାଇ
ତୁମ ଛଡ଼ା ଏକଥାକୁ ଆଉ କେ ଦେବ ସୂଚାଇ
ବୁଦ୍ଧିବାଟ ମୋତେ କିଛି ଦିଶୁନାହିଁ ସେଥିପାଇଁ
ସମାଧାନ ହିଁ କେବଳ ତୁମପାଖେ ଅଛି ରହି ।
ତୁମଠାରେ କି ସମ୍ପର୍କ ତା' ବି ବାରି ନପାରଇ
ଆତ୍ମା ପରମାତ୍ମା ହୋଇ ଦେହୀ ଦେହେ ଅଛେ ରହି
ଏକଥା କେବଳ ମୋର ମନଟି ଦିଏ ବୁଝାଇ
କିପରି ଜାଣିବି ସତ ସେହି ପଥେ ଯାଅ ନେଇ ।