କବିତା
କବିତା
.
କବିତା ଗୋ !ତୁମେ କାବ୍ୟ ନାୟିକା
ଚେହେରାରେ ଚଉଦାଳୀ
ରମ୍ୟସୁନ୍ଦର ପାରିଜାତ ବନ
ଚେତନାରେ ଚଇତାଳି ।
କଳ୍ପନା ବିଳାସୀ କାଉଁରୀ କାମନା
ଶବ୍ଦ ସମୁଦ୍ରର ଢେଉ
ବିରହ ବିଷାଦ ବିଚ୍ଛେଦ ମିଳନ
ପ୍ରୀତି ପିଆଲାର ମହୁ ।
ଶାମୁକା ସ୍ୱପ୍ନର ସୁପ୍ତ ଧରିତ୍ରୀ
ମଧୁର ମର୍ମର ଗୀତି
ସ୍ପନ୍ଦନ ତୁମେ କମ୍ପନ ତୁମେ
ଅଲିଭା ସ୍ଵାକ୍ଷର ସ୍ମୃତି ।
ପ୍ରଳାପ ତୁମର ପ୍ରଣୟ ଗୀତିକା
ସଂଳାପେ ସମ୍ପର୍କ ସେତୁ
ଲାଜକୁଳି ଲତା ଲାବଣ୍ୟବତୀର
ରଙ୍ଗଣୀ ଫୁଲର ଋତୁ ।
କଳ୍ପନାର କୁଞ୍ଜ ମଧୁକ୍ଷରାଲଗ୍ନ
ମହୁଆ ମାଦକ ଭରା
କବି ମାନସର କାବ୍ୟ କଉସ୍ତୁଭ
ଲକ୍ଷେହୀରା ପ୍ରାଚୀତାରା ।