ହୃଦୟ ବିହୀନ
ହୃଦୟ ବିହୀନ
ଏ ଛାତର ଛାତିରେ ଆଜି
ମୁଁ ନୁହେଁ ଏକା…
ମୋ ସାଥିରେ ଆକାଶର
ମେଘ ଆଉ ତାରା-ଚିତ୍ରଲେଖା ।
ଉନ୍ନତ ହୁଏତ ନୁହେଁ
ମୋର ଶବ୍ଦ ସଂଯୋଜନା…
ଅବର୍ଣ୍ଣନୀୟ କିନ୍ତୁ
ତାରାଙ୍କର ଏ ସଂରଚନା ।
ଭ୍ରାମ୍ୟମାଣ ବଉଦର
ଖୁସି ଆଜି ଏତେ କି ବେଶି.. !
କେବେ ଦୂରେ ଭାସିଯାଏ
ଅଚାନକ ଝରିଯାଏ..
କହିଯାଏ କେତେ କଥା ହସି ।
ତମର ଖବର ନେଇ..
ଆସେ ସିଏ ଧାଇଁ ଧାଇଁ…
ମୋ ପାଖରେ ପହଞ୍ଚିଲା ପରେ..
ପୀରତି ବାରତା ଦିଏ…
ବଦମାସ୍… !
ତାରାଙ୍କୁ ଆଖି ଠାର ମାରେ ।
ତମେ ବୋଧେ ଖୋଜୁଅଛ
ମତେ ଆକାଶରେ…
ଖୋଜ ଥରୁଟିଏ
ତମ ହୃଦୟ ଭିତରେ ..
ପାଇଯିବ ଭେଟ ମୋର
ଅତି ସହଜରେ ।
ମୁଁ ନୁହେଁ ଦୂରଦେଶୀ
ଆକାଶର ଜହ୍ନ…
ମୋ ଠିକଣା ତୁମର ସେ
ଅଭିମାନୀ ମନ ।
ମତେ ଯଦି ତୁମେ ତୁମ
ଭିତରେ ପାଉନ…
ବୋଧହୁଏ ତୁମେ ଖୁବ୍
ହୃଦୟ ବିହୀନ ।