ହଜିଲା ଧନ

ମିଳିଯାଏ କେବେ ଭାଗ୍ୟରେ ଯୋଗକୁ

ଖୋଜିଲା ହଜିଲା ଧନ

ଲାଗେ କୋଟିନିଧି ପାଇଲା ପରାଏ

ଆନନ୍ଦ ହୁଅଇ ମନ ।

କହନ୍ତି ସୁଜନେ ହଜେ ନାହିଁ କେବେ

କଷ୍ଟଲବ୍ଧ ସତ ଧନ

ଝଟକି ଉଠଇ ପୋଡିଲେ ନିଆଁରେ

ଯେସନ ଶୁଦ୍ଧ ସୁବର୍ଣ୍ଣ ।

ଭାସଇ ଜଳରେ ଉଡଇ ପବନେ

ମାଟିରୁ ଉଠେ ଗଜୁରି

ସତ ଧନ କେବେ ହଜେ ମରେ ନାହିଁ

ଫୁଲଫଳେ ଉଠେ ଭରି ।

ମାତାପିତାଙ୍କର ଅମୂଲ୍ୟ ରତନ

ଜନ୍ମକଲା ପୁଅଝିଅ

ଘର ପରିବାରୁ କରଇ ବିଚ୍ଛିନ୍ନ

ସମୟ କରାଳ ସୁଅ ।

ହଜିଯାଏ ମନ ହୃଦୟ ଭ୍ରମରେ

ନିଜ ହୁଏ ସାତପର

ସ୍ୱାଧୀନ ସ୍ୱତନ୍ତ୍ର ବୋଲାଏ ମଣିଷ

ସ୍ୱପ୍ନେ ଗଢେ ବାଲିଘର ।

ଘୋର ବନସ୍ତରେ ବୁଲୁଥାଏ ହସ୍ତୀ

ହୋଇପାରେ ବଳବାନ

ରାଜାଙ୍କର ସିଏ ପରିସର ଭୁକ୍ତ

ସମୃଦ୍ଧି ସୁରକ୍ଷା ଧନ ।

ବିଧିର ବିଧାନ ଲାଗଇ ବିଚିତ୍ର

କିନ୍ତୁ ସତ୍ୟ ଆଧାରିତ

କଷ୍ଟ କଲେ କୃଷ୍ଣ ପୁଞ୍ଜି ସତ ଧନ 

ଅବଶ୍ୟ ହୁଏ ଅର୍ଜିତ ।