ଦୁଃଖିଆ ଅଜା

ଗରୀବ ହୋଇ ଜନ୍ମ ନେଇଛି ଧରିତ୍ରୀ କୋଳରେ 

ଦୁୁଇଓଳି ଦୁଇମୁଠା ଆହାର ନାହିଁ ମୋ ଭାଗ୍ୟରେ

ଝାଟମାଟି କୁଡ଼ିଆ ଘରେ ବିତି ଯାଇଛି ଦିନ

ରଜନୀରେ ଶଶାଙ୍କ ସାଥି ଆଉ ପ୍ରଭାତରେ ତପନ ।।

ଚାରି ପ୍ରାଣୀ କୁୁୁଟୁମ୍ବ ସଦା ମୋ ଉପରେ ନିର୍ଭର

ସାତସିଆଁ ବସ୍ତ୍ରରେ ଢାଙ୍କିଛି ତାଙ୍କରି ଶରୀର

ଭୋକ ଜ୍ଵାଳା ପ୍ରତିହିତ ପାଇଁ ପାଖେ ନାହିଁ ଅର୍ଥ

ସେ ଅସହାୟତା ଦେଖିଲେ ଲାଗେ ଜୀବନ ବ୍ୟର୍ଥ ।।

ବି.ପି.ଏଲ୍‌. ରାସନ କାର୍ଡ଼ ମିଳିଛି ମୋରି ନାଁରେ

ହେଲେ ସେଥିରୁ କିଛି ପଶେ ଡିଲର ପକେଟରେ

ଇନ୍ଦିରା ଆବାସ କାନ୍ଥ ଚାହିଁ ରହିଛି ଜଳକା

ସଂପୂର୍ଣ୍ଣ କରିବାକୁ ତାକୁ ମିଳୁନାହିଁ ମଉକା ।।

ତଥାପି ଆଖିରେ ଭରିଛି କେତେ ଯେ ସପନ

ସନ୍ତାନର ସୁଖ ଦେଖିବାକୁ ବ୍ୟାକୁଳିତ ମନ

ଉତ୍ତମ ଶିକ୍ଷା ଦେବି ବୋଲି ପୁଅ ଝିଅଙ୍କୁ

ପାଠ ପଢିବାକୁ ଛାଡ଼ଇ ନିତି ବିଦ୍ୟାଳୟକୁ ।।

ପ୍ରିୟ ପରିଜନ ସାଥି ନ କରନ୍ତୁ ଉପହାସ

ଗରୀବବୋଲି କେହି ମତେ ନ କରୁ ଅବିଶ୍ୱାସ

ସରକାରୀ ଯୋଜନାରେ ଫଳ ପାଇଁ ନାହିଁ ଆଶା

ଝାଳ ବୁହା ପରିଶ୍ରମର ମୂଲ ଏକା ଭରସା ।।