ଚକୋରୀ
ଚକୋରୀ
ମୋ ସ୍ମୃତିରେ
ମୋ ଅନୁଭୂତିରେ
ମୋ ବିଶ୍ଵାସରେ
ମୋ ନିଃଶ୍ବାସରେ
ମୋ ପ୍ରାଣରେ, ପ୍ରତିଟି ତନ୍ତ୍ରୀରେ
ମୋ ହୃଦୟର ସ୍ପନ୍ଦନରେ
ଶିରାରେ, ପ୍ରଶିରାରେ
ରକ୍ତ, ମାଂସ, ସ୍ବେଦରେ
ମୋ ଚାରିପାଖର ପୃଥିବୀରେ
କେବଳ ତୁ--।
ତୋ ଦେହର ବାସ୍ନା
ତୋ ନୂପୁରର ନିକ୍ବଣ
ତୋ ଚାଲି, ତୋ ହସ, ତୋ ବେଶ
ମୋ ଇଲାକାରେ
ମୋ ଅନ୍ତରରେ ସାଇତା।
ତଥାପି-
ତୋ-ମୋ ଭିତରେ
ଏକ ଅପହଞ୍ଚ ଦୂରତା
ଜହ୍ନ-କଇଁ ପରି
ଆକାଶ-ପୃଥିବୀ ପରି।
ତୁ ଆଜି ମୋ ପାଇଁ ସ୍ବପ୍ନ
ବୃଥା ପ୍ରୟାସ ମୋର
ଜହ୍ନ ରାତିର ଚକୋରୀକୁ ପାଇବାରେ।