ବିଦ୍ୟାଳୟ

ଏକୁଟିଆ ଆଜି ଠିଆ ମୁଁ ହୋଇଛି

ନିଃସ୍ବ ପରାୟେ ହୋଇ

ଆଠ ମାସ ହେଲା ନିରବି ଯାଇଛି

କୋଳାହଳ ଶୁଭେ ନାହିଁ ।

କେତେ ଛାତ୍ର ଛାତ୍ରୀ ପଢୁଥିଲେ ପାଠ

ମୋ ଘରେ ବସି ନିଇତି

ଦିନ ସାରା ଏଠି ପାଠପଢା ଚାଲେ

କେତେ ଲୋକ ଆସିଯାନ୍ତି ।

ସେବକ ଭାଇ ମୋ ପରିଷ୍କାର କରେ

ଶ୍ରେଣୀଗ୍ରୃହ ଦାଣ୍ଡ ଦ୍ବାର

ଗଣି ଗଣି ଘଣ୍ଟା ବଜାଇ ଦିଏ ସେ

ପ୍ରତିଦିନ ଆଠ ଥର । 

ଦଶଟା ବେଳକୁ ପ୍ରାର୍ଥନା ଆରମ୍ଭେ

ଧାଡି ହୋଇ ପିଲାମାନେ

ବନ୍ଦନା କରନ୍ତି ସ୍ତୁତି ଗାଇଥାନ୍ତି

ସଭିଏଁ ଭକତି ମନେ ।

ଖେଳଛୁଟି ବେଳେ ଜଳପାନ କରି

ଖେଳନ୍ତି ମୋ ପଡିଆରେ

କବାଡି ବାଗୁଡି ଫୁଟ୍ ବଲ୍ ଖେଳ

ଲୁଚା ଲୁଚି କିଏ ଖେଳେ ।

ଘୋ ଘୋ ନାଦରେ ଉତ୍ଫୁଲିତ ହୋଇ

ମନମୋର ପୁରିଯାଏ

ଅଗଷ୍ଟ ପନ୍ଦର ଜନରାଜ୍ୟଦିବସେ

ପଡିଆଟା ଭର୍ତ୍ତି ହୁଏ ।

ଅତିଥି ଆସିଲେ କୁହନ୍ତି ପିଲାଙ୍କୁ

ନା ନା ଉପାଦେୟ ବାଣୀ

ସେ ବାଣୀକୁ ପିଲେ ପାଥେୟ କରିଲେ

ହୁଅନ୍ତି ଦେଶର ମଣି ।

ଶ୍ରୀ ଗଣେଶ ପୂଜା ସରସ୍ବତୀ ମାତା

ପୂଜା ହେଲେ ବିଦ୍ୟାଳୟେ

ନୂଆ ଡ୍ରେସ୍ ପିନ୍ଧି ପୂଜା କଲେ ମାତା

ଆଶିଷ ଅଜାଡି ଦିଏ ।

ଖେଳ କସରତ ପୂଜା ମହୋତ୍ସବ

ଆଠମାସ ହେଲା ମନା

ମୁହେଁ ମାସ୍କ ବାନ୍ଧ କାହାକୁ ଛୁଅଁନା

ମାଡିଯିବ ଯେ କରୋନା ।

ଗୁରୁଜୀ ଗୁରୁମା ପଢାଉ ଅଛନ୍ତି

ମୋବାଇଲି ଟିପି ପାଠ

ମୁରୁଖ ହୁଅନ୍ତି ପିଲାମାନେ ମୋର

ସେଥିପାଇଁ ମନ ଦୁଃଖ ।

ସାନିଟାଇଜର୍ରେ ହାତ ଧୋଇ ଧୋଇ

ଧଳା ପଡିଲାଣି ହାତ

ତଥାପି କରୋନା ଛାଡୁନି ଦେଶକୁ

ସରକାର ଅଣାୟତ୍ତ ।

କିପରି ବିଚାର କରେ ସରକାର

ଖୋଲିବାକୁ ବିଦ୍ୟାଳୟ

ନାହିଁ ପ୍ରତିଷେଧ ନାହିଁ ଓଉଷଧ

ପିଲା ଯିବା ପାଇଁ ଭୟ ।

ମୁରୁଖ ହୋଇବେ ଆମ ଭବିଷ୍ୟତ

ଛାତ୍ର ଛାତ୍ରୀ ଯେତେଛନ୍ତି

ପ୍ରଭୂ ଜଗନ୍ନାଥ ସାରା ସଂସାରକୁ

କରୋନାରୁ କର ମୁକ୍ତି ।