माणसातला पशू

     नव्या नवलाईचे दिवस आत्ताच तर कुठे सुरू झालेले , पण सरू पुरती धास्तवून गेलेली .पहिल्या रात्रीची जी स्वप्न तिने पाहिली होती,ती पूर्ण तर झाली पण पहिल्या वेळेस असेच होत असावे असे समजून तिने ते सहन केले . पण या पाच सहा दिवसात मात्र दिवसासुध्दा होणाऱ्या त्या मनाविरुध्द घडणाऱ्या शारीरिक अत्याचाराने ती थकून जावू लागली.  

    घरात सासू सासरे दोघेच . एक नणंद होती तीही दोन दिवसांनी तिच्या सासरी गेली होती . बरं नवरा कुठे कामालाही जात नव्हता , वडिलोपार्जित घरची शेती आणि किरणामालाचे दुकान जवळच असल्याने तो मनात येईल तेव्हा घरी यायचा .

     नवीन आहे म्हणून सासू सासरे पण हसुन दुर्लक्ष करायचे . तिची कुचंबणा होत होती . इतर वेळेला नवरा तसा खुप छान वागत होता , फिरायला जाणे , तिची काळजी घेणे ,या गोष्टी तो खुप मनापासून करायचा त्यामुळे तिला त्याचे प्रेम कळतं होते .पण त्याच्यातला त्या क्षणी जागृत होणारा वासनेचा पशू तिला नकोसा होवून जाई , तिथे तिला हळुवार जपणे त्याला जमतच नसायचे . तिच्या शरीराचा जबरदस्ती ताबा घेत तो तिला अगदी चोळामोळा करून मगच शांत होत असे . 

  सरू या प्रकाराला घाबरून त्याच्यापासून लांब राहू लागली होती पण तो काही तिला सोडत नव्हता . एकदोन दिवस माहेरीसुध्दा तिला तो सोडत नव्हता . 

   दिवसेंदिवस ती खुप अशक्त आणि आजारी दिसू लागली .लग्नानंतर नव्या नवलाईचे चेहऱ्यावर येणारे तेज तिच्या चेहऱ्यावर मात्र दिसत नव्हते . 

   ती तिच्यासोबत काय घडते आहे ते कोणालाही सांगू शकत नव्हती . कारण नवऱ्याचा बाकीच्या प्रेमळ वागण्याचा प्रभाव सरू सोबतच इतरांवरही जरा जास्तच पडायचा . पण त्यामुळे सरूची मात्र मानसिक कोंडी होत होती .

     एक दोन महिन्याने तिला दिवस गेल्याची चाहूल लागली . घाबरत घाबरत तिने घरात सांगितले , सगळे खुश झाले , तिला मनातुन वाटू लागलं की आता बाळाच्या चाहुलीने , काळजीने तरी आता तीच्यावरचा अत्याचार थांबेल पण तिला जबरदस्त धक्का बसला . नवऱ्याच्या त्या पशू वृत्तीला तिच्या त्याही परिस्थितीमध्ये कुठेही फरक पडला नव्हता. त्याच्यातल्या वासनांध वृत्तीला समोर असणाऱ्या एका शरीराव्यतिरिक्त दुसऱ्या कशाचीही पर्वा नव्हती .

   त्याचा परिणाम व्हायचा तो झाला आणि दोन महिन्याने तिला त्रास होवून , आताच कुठे आपले अस्तित्व दाखवणाऱ्या आपल्या गर्भाला मुकावे लागले .

    हॉस्पिटल मधून तिने मग आरामासाठी माहेरी जाण्याचा हट्ट धरला आणि सगळ्यांच्या आग्रहाने नवऱ्याने नाखुशीने तिला दोन दिवसांनी न्यायला येतो म्हणून परवानगी दिली .

    माहेरी आल्यावर मग तिने आईला सगळं सांगितलं आणि परत त्या शरिरपिपासू पशुकडे पुन्हा जाणार नाही म्हणून आईला आपला निर्णय ठामपणे सांगितला.