पर्यावरण गीत
पर्यावरण गीत
विचार आधी पर्यावरणाचा |
पिटा डांगोरा मग विकासाचा ||धृ||
मेट्रो, मोनो, माॅल मिळाले
पण हिरवेपण पाहा गळाले
ना 'नाणार'विषयी नाराजी
परी प्रदूषण चिंता ताजी
विचार आधी करा भविष्याचा |
पिटा डांगोरा मग विकासाचा ||१||
भकास जमिनी विकास नाही
लाज वाटू द्या मनास काही
जंगले का ही का तोडताय?
जंगले सिमेंटची हाय! हाय!
विचार आधी हरितक्रांतीचा |
पिटा डांगोरा मग विकासाचा ||२||
केमिकल पाणी धाक सुटे
वायुगळती कुठे कुठे
ग्लोबल वाॅर्मिंग देई वाॅर्निंग
जागे व्हा हो, सोडा झिंग
ताठा न ; साठा हवा ज्ञानाचा |
पिटा डांगोरा मग विकासाचा ||३||
पाही मानव हित मानवाचे
हित कसले? अहित सगळ्यांचे
घरट्यांची लागे वासलात
पशू वन्य धावती शहरात
विचार आधी करा दुसऱ्याचा |
पिटा डांगोरा मग विकासाचा ||४||
पाहा टिकले जर पर्यावरण
नांदू सुखाने सारे आपण
खुशाल यशाची मशाल नाचवा
पर्यावरण आधी वाचवा
विचार आधी टिकून राहण्याचा |
पिटा डांगोरा मग विकासाचा ||५||
विचार आधी पर्यावरणाचा |
पिटा डांगोरा मग विकासाचा ||