मी, ती आणि बरंच काही

तिची वाट पाहत गप्प बसणारा मी

आणि 

मला हळूच पाहणारी ती ||

तिचा आवाज ऐकू येता खुश होणारा मी

आणि

गालातल्या गालात हसणारी ती ||१||

नेहमीच भारावून गेलेलो मी

आणि

सर्वदा भानावर असलेली ती ||

शब्दांनी बोलका होणारा मी

आणि

फक्त नजरेनं अबोला तोडणारी ती ||२||

मनातलं गुपित अलगद लपवणारा मी

आणि

सर्व काही सांगून मोकळी होणारी ती ||

तिच्यासाठी कामावर जाणारा मी

आणि

माझ्यासाठी कामातून वेळ काढणारी ती ||३||

आज अचानक तिच्यामुळे मलाच भेटलेलो मी

आणि

माझ्याहून जास्त मला समजू शकलेली ती ||

प्रेमासाठी सर्व काही हरवून बसलेलो मी

आणि

मला प्रेमाचा रोज नवा अर्थ सांगणारी ती ||४||