" मी आहे ना ! "

नाती --व्यवहारी जगाच्या वाळवंटात ,

     क्याक्टस सारखी -काटेरी , बोचणारी ,

      तरीही एखाद्याच फुलानं- मोहवणारी --

      

नाती --वर्षाकाळी पसरलेल्या हिरवळी सारखी ,

     नजरेला सुखावणारी , तृप्त करणारी ,

     पण हंगामी --

नाती --उबेसाठी वाट बघत गोठून जाणारी ,

      जगण्याच्या केविलवाण्या धडपडीत ,

      वाळून जाणारी , ओघळून गेलेल्या

     अश्रूं सारखी --

नाती--नि: शब्द, अबोल , अनाम ,

     मध्य रात्रीच्या पाव्या सारखी,

     कृष्ण -राधेच्या प्रेमा सारखी,

     विदेही, -तरीहि शाश्वत --

नाती --आपलं म्हणवणाऱ्या कुणीतरी ,

      दिलेल्या वेदनांचे दंश ,

      लपवून ठेवण्या साठी -

     तन -मनाला गारवा देणाऱ्या ,

     घनदाट वृक्षा सारखी --

नाती --बाहेरच्या आणि आतल्या तापाला 

      पावसा सारखं भिजवत ,

      हळूच सांगणारी "मी आहे ना!"

      तुझ्या जवळ --

      अगदी तुझ्या जवळ "---