आठणीतला पाऊस

आठवत का तुला ते,

पावसात चिंब दोघांनी भिजलेलं |

अन एकमेकांकडे पहात,

पाणी अंगावरच जिरलेलं ||

धरणीच्या चिंब प्रेमाने ,

आकाशही होत भरून आलेलं |

आकाशाचे प्रेम सरीतून त्या,

धरणीपर्यंत ते पोचलेलं ||

गुलाबी गालावर तुझ्या ,

अलगद थेंबाने त्या थांबलेलं |

ओठांना स्पर्शुन तेव्हा,

लबाड पावसाने मला खिजवलेलं ||

बरसणाऱ्या पावसात हळूवार,

प्रेम आपले बहरलेलं |

हातात हात असुनही सखे,

मन मात्र आपले शहारलेलं ||

मजसारखे तुझ्या कोमल स्पर्शाने,

वाऱ्याने हि बेफाम झालेलं |

अन ओंजळीत तुझ्या शांत,

थेंबा थेंबाने विसावलेलं ||

आता पाऊस नेमेची येतो,

सरींसोबत तुझी आठवण फक्त |

ओंजळ माझी रिती राहिली,

प्रेमाचे स्वप्न मनी ते उरलेलं ||