घर
घर
1 min
187
इमारतीच्या या तोबा गर्दीत,
घर कुठेतरी हरवलं आहे,
फक्त चार भिंती आहेत
आणि त्यावर छप्पर बसवलं आहे //धृ//
एका छपराखाली असली तरी
नाती हि सारी अबोल आहेत,
ओलावा सरत चालला आता
अंतर नात्यातले वाढवलं आहे //१//
सगळे आता ऑनलाईन झाले
शुभेच्छा हि त्याला अपवाद नाहीत,
असले मित्र लाखो तरी
खऱ्या मैत्रीला मन आसुरलं आहे //२//
प्रत्येकाकडे मोठे घर आहे
दमून घरी परतण्यासाठी,
मात्र शांत झोपेसाठी
अंगाईला मन मात्र तरसलं आहे //३//
पालकांना नि आता वेळ नाही
चिमुरड्यांना आपल्या देण्यासाठी,
जगण्याच्या या धडपडीमागे
बालपण पहाणे आपण चुकवलं आहे //४//
विचार करा यावर थोडा
नाजूक या रेशीम गाठींवर,
वेळ सरली कि सुटतील साऱ्या
नातं ज्यावर विसावलं आहे //५//