ಇವಳು........ ಲೋಕಜ್ಞಾನವಿಲ್ಲದವಳು.. ಅಮ್ಮ?...

ಇವಳು........ 

ಲೋಕಜ್ಞಾನವಿಲ್ಲದವಳು.. ಅಮ್ಮ?... 

ಸಂಬಳವಿಲ್ಲದ ಅಡುಗೆ ಮನೆಯ ಆಳು

ಕುದಿಯುವ ನೀರು ಕುಕ್ಕರಿನ ಕೂಗಲಿ

ಪಾತ್ರೆಗಳ ಸದ್ದಿಗೆ ಉರಿಉರಿವ ಬೆಂಕಿಯಲಿ

ಉರಿದು ಹೋಯಿತು ಇವಳ…ನಗು? 

ಈರುಳ್ಳಿ ಒಗ್ಗರಣೆ ಘಾಟಿಗೆ ಕಣ್ಣೀರು

ಹುಳಿಯಾದ ಬದುಕು ಕಲ್ಲುಪ್ಪಿನಂತೆ ಕರಗಿದರು

ತೋರಲೇ ಇಲ್ಲ ಮನದಾಳದ ನೋವುಗಳ

ಈ ಅಮ್ಮ ಲೋಕಜ್ಞಾನವಿಲ್ಲದವಳು….. ?.

ಅಪ್ಪನ ಕೋಪ ತಾಪದ ನುಡಿಗಳು

ಹರಿತ ಚಾಕು ಮಕ್ಕಳ ಮಾತುಗಳು

ಕಾಳುಹುರಿದಂತೆ ಮಾತನಾಡುತ್ತಿದ್ದವಳು

ಮಾತನ್ನೆ ಮರೆತು ಮೂಕಿಯಾದಳು

ಈ ಅಮ್ಮ ಲೋಕಜ್ಞಾನವಿಲ್ಲದವಳು….. ?.

ಕಪಾಟಿನ ಸೀರೆಗಳಲಿ ಮಲಗಿದ ಮನದಾಸೆಗಳು

ಹಳೆಯ ಪಾತ್ರೆಗಳಲಿ ಅವಿತುಕೊಂಡ ಬಯಕೆಗಳು

ಪತಿ ಮಕ್ಕಳಿಗೆ ಬಿಸಿ ಬಿಸಿ ಭೋಜನ ಬಡಿಸಿ

ನಗುತಲಿ ತಾ ತಿಂದಳು ತಂಗಳು……ಮೌನವಾಗಿ

ಈ ಅಮ್ಮ ಲೋಕಜ್ಞಾನವಿಲ್ಲದವಳು….. ?.

ಮನೆಯ ಎಲ್ಲರ ಬೇಕುಬೇಡಗಳನ್ನು ಅರಿತವಳು

ಯಾರಿಗೇ ನೋವಾದರೂ ತಾನೂ ಕೊರಗುವವಳು

ಸಂಸಾರದ ಬೆನ್ನೆಲುಬಾಗಿ ಸುಖ ಬಯಸುವವಳು

ಕೊನೆಯಲ್ಲಿ ಯಾರಿಗೂ ಬೇಡವಾದಳು… ಇವಳು

ಈ ಅಮ್ಮ ಲೋಕಜ್ಞಾನವಿಲ್ಲದವಳು….. ?.

ಎರಡೊತ್ತಿನ ಕೂಳಿಗೆ ಇಂದಿಗೂ ಸದ್ದಿಲ್ಲದೆ 

ಗಾಣದ ಎತ್ತಿನಂತೆ ಮೌನವಾಗಿ, ಮೂದಲಿಕೆ 

ಚುಚ್ಚು ನುಡಿಗಳ ಉಡುಗೊರೆ ಪಡೆದು, ಭಾವನೆಗಳಿಲ್ಲದೆ

ದುಡಿವಾ ಜೀವಕೆ ನಿವೃತ್ತಿ ಉಂಟೆ,

 ಈ ಅಮ್ಮನ ಪದಕ್ಕೆ ನನ್ನೇರಡು ಸಾಲುಗಳು ಸಮರ್ಪಕ.... 

💖✍️M H HUDEDA