ಈ ಹೊತ್ತಿನ ತಲ್ಲಣ...
ಈ ಹೊತ್ತಿನ ತಲ್ಲಣ...
ನಿಂತಿರುವೆ ನಾನಿಂದು ಪರದೆಯ ಹಿಂದೆ
ಕೊನೆಯ ಬಾರಿ ನಾನು ನಾನಾಗಿರುವಂತೆ
ಇನ್ನೆರಡು ನಿಮಿಷದಲಿ ಬೀಳುವುದು ಹಾರ
ಜೊತೆಯಲ್ಲೇ ನಡೆಯುವುದು ನನ್ನ ಸಂಹಾರ
ಹೊಸದೊಂದು ಮನೆಯಲ್ಲಿ ಹೊಸತೊಂದು ಹೆಸರು
ಹಳೆಯ ಮನೆ ಅದಾಗುವುದೆನ್ನ ತವರು
ಪರದೆಯ ಮುಂದಿಹಿದು ಮತ್ತೊಂದು ಜೀವ
ಇದೆಯಂತೆ ಅವನಿಗೆ ಪ್ರೀತಿಯ ಭಾವ
ಅರಿಯದಾ ಜನರೊಡನೆ ಬೆರೆಯುವುದು ಹೇಗೆ
ನಯನಕೆ ಕಾಣುವ ಮುಖ ಒಂದೆ ತಾನೆ
ಆ ಮುಖದ ಹಿಂದೆ ಇನ್ನೆಷ್ಟು ಮುಖವಿದೆಯೋ
ಈ ಕಷ್ಟ ಹೆಣ್ಣಿಗೊಂದೆ ಅದು ಹೇಗೆ ಸರಿಯೋ
ಸುತ್ತಲೂ ನಿಂತಿಹರು ನನ್ನೆಲ್ಲ ಬಂಧುಗಳು
ಆದರೂ ಇಂದಿಗೂ ಒಬ್ಬಂಟಿಯೇ ಮಗಳು
ಎಲ್ಲರ ಮೊಗದಲ್ಲಿ ಸಂಭ್ರಮವು ಮಿಂಚಿಹುದು
ಈ ನನ್ನ ತವಕವದು ಯಾರಿಗೂ ತಿಳಿಯದು
ಅಷ್ಟರಲಿ ಸರಿಯಿತು ಅಂತರದ ಪರದೆ
ಅಕ್ಷತೆಯ ಮಳೆಯಾಯ್ತ ಕ್ಷಣವು ಬಿಡುವಿರದೆ
ಮರೆಯಲ್ಲಿ ನಿಂತಿದ್ದ ಕಣ್ಣೆರಡು ಕಂಡಿತು
ನಿನ್ನೊಡನೆ ನಾನಿರುವೆ ಎಂದೆನಗೆ ಹೇಳಿತು
ಈ ತವಕ ನನ್ನಲಿಯು ಇಹುದು ಸಮವಾಗಿ
ಇಹುದೊಂದೇ ಮುಖವು ನೋಡದನು ಸರಿಯಾಗಿ
ಆ ತವಕ ಮೀರಿಯು ನಗುತಿಹೆ ನಾನಿಲ್ಲಿ
ಬಯಕೆಯದು ಒಂದೇ ನೀನಿರು ಜೊತೆಯಲ್ಲಿ
ವಿಶ್ವಾಸ ಇಟ್ಟಿಹರು ನಮ್ಮಲ್ಲಿ ಈ ಜನರು
ಅದಕೆಂದೆ ಇಷ್ಟೊಂದು ಸಂಭ್ರಮ ಪಡುತಿಹರು
ಸಂಭ್ರಮದಿ ಸೇರಿಕೊ ಇದೆ ಅದಕು ಕಾರಣ
ಇದು ಬರಿಯ ಈ ಹೊತ್ತಿನಾ ತಲ್ಲಣ