બાળપણ

ભણવાને હું બેસું એવા જોવાને બોલાવે,

વડદાદા કોયલડી પાસે ટહુકાઓ ચીતરાવે !

લખું કશું તો શબ્દો સઘળા પતંગિયા થઈ જાતાં,

રંગબેરંગી પાંખો લઈને મારી ફરતે ગાતાં.

એની પાંખે બેસીને મન ફરતું ફૂલે-ફૂલે,

અહા ! મજાનું હિલ્લોળા લેતું એ કેવું ઝૂલે.

થાતું કે વાદલડી પાછળ જઈ સંતાઈ જાઉં,

મમ્મી-પપ્પા છો ને શોધે, કોઈને ના દેખાઉં !

રાત પડે એ પહેલાં નભને રંગું ધોળા રંગે,

તારલિયાની ટોળીને લઈ જાઉં મારી સંગે.

સંતાકૂકડી રમી રમીને જ્યારે થાકી જાઉં,

ચાંદામામાના ખોળામાં જઈને પોઢી જાઉં.