પ્રેમ અનહદ પણ મળે
પ્રેમ અનહદ પણ મળે
જે તરફથી પ્રેમ અનહદ પણ મળે.
પાડવા ના ત્યાં જ કાસદ પણ મળે.
હોંશિયારી ઘાસ કાપે, ને વળી,
હોય ના લાયક અને પદ પણ મળે.
થાક જેવું લાગશે મનને ય જ્યાં,
ફાવશે એવી જ ફુરસદ પણ મળે.
લાખ કોશિશ બાદ મળતુું ફળ નથી
હા, બગાસું ખાઇ, મકસદ પણ મળે.
યાદ કરતા હોય કાયમ જેમને,
આવતા સામે જ ગદગદ પણ મળે.
છેતરી જાશે છું ભોળો એટલો,
આમ ઈરાદા હવે બદ પણ મળે.
આમ તો સૂરજ તિમિર નાશક, ખરો.
માંહ્ય અંધારું જ ખદબદ પણ મળે.
આથમીને થાકવાનું ક્યાં સુધી?
ને ક્ષિતિજની કોઇ સરહદ પણ મળે.
આંખ સૌની ભીંજવીને જાય તું,
ને "કમલ" એવી જ રુખસદ પણ મળે.