ઝરણાનું ગીત

અમે કહ્યુ અંધકારમાં ક્યાંય સૂજે નહીં મારગ,

ઝરણું બોલ્યું માંડ ચાલવા, આગળ સઘળું ઝગમગ.

અમે કહ્યુ કે આડા આવે ભેખડ-પાણા-પર્વત,

ઝરણું હસતાં બોલ્યું એને વહાલ કરી વધ આગળ.

અમે કહ્યુ કે સૂનું લાગે એકલપંડે વહેવુ,

ઝરણાએ ગાયું કે કોઈ ગીત સદા ગણગણવું.

અમે કહ્યુ કે અટકી જઈશું એવી બીક સતાવે,

ઝરણાએ મલકીને કીધું કે કરશું મજા તળાવે.

અમે કહ્યુ કે ઝરણાં તારી વાતોમાં છે દમ,

ઝરણું કંઈ ન બોલ્યું, તે તો વહ્યા કર્યું હરદમ