ચાલ વરસાદની મોસમ છે
ચાલ વરસાદની મોસમ છે
ચાલ વરસાદની મોસમ છે,
ગીતો ગાતા રહીએ,
ઝરમર..ઝરમર .. વર્ષામાં,
ભીના ભીના થઈએ..
ચાલ વરસાદની...
અંગ ઉપરના વસ્ત્રો નીચે,
ધબક ધબક ધબકે,
ભીની ભીની મોસમમાં,
મીઠી યાદો છલકે,
બચપનમાં કીધેલી હરકત,
આજે પાછી કરીએ,
ખોટા આડંબર અંચળાને,
ચાલ ફગાવી દઈએ.
ચાલ વરસાદની મોસમ...
હું બાબો હતો, તું બેબી હતી,
ભેદ કળાતો નહોતો,
ટગર ટગર આંખોમાં,
માસૂમ પ્રેમ ઉભરાતો,
આજે બીજા બચપનમાં એ,
વાતો તાજી કરીએ,
મર્યાદામાં રહીને થોડા,
ચેનચાળા કરી લઈએ,
ચાલ વરસાદની મોસમ...
અંગમાં જ્યારે યૌવન હતું ત્યારે,
ફૂટ્યાતા કેસરિયા ફૂલ,
છાનગપતીયા કરવામાં આપણે,
રહેતા હતા મશગુલ,
આજે બચપન - યૌવનને,
ઘડપણમાં ઘૂંટી લઈએ,
હું મોરલો તું ઢેલ બનીને,
થનગન નર્તન કરીએ,..
ચાલ વરસાદની મોસમ...
બીજી - ત્રીજી પેઢીની નજરમાં,
છોને આ બધું આવે,
તેઓ મોબાઈલના કેમેરાની,
સ્વિચ ભલે ને દબાવે,
આજની પેઢીને આપણા યૌવનની
ઝલક બતાવી દઈએ,
પછી એમના અંતરમાં પેસી,
તરબતર થઈ જઈએ.
ચાલ વરસાદની મોસમ.