ଦୋଷ ଦେବନି ଜମା
ଦୋଷ ଦେବନି ଜମା
କାଞ୍ଚନ ମଲ୍ଲିକ
ତୁମେ ଅଖାଟିଏ ପାରିଦେଲ
ମୁଁ ପାଦ ଥାପିଦେଲି
ତୁମେ କାନ୍ଥ ବଢେଇଦେଲ
ମୁଁ ବସିଗଲି
ତୁମେ ଛପର ପକେଇଦେଲ
ମୁଁ ଆରାମରେ ଶୋଇଗଲି ।
ଏବେ ପାରୁଛ ତ ଶୀଘ୍ର
କବାଟଟିଏ ଲଗାଇଦିଅ
ନ ହେଲେ ଶେଷକୁ ମୋତେ
ଦୋଷ ଦେବନି ଜମା,
କାରଣ, ଶୋଇଲେ ହିଁ ନିଦ ଆସେ
ନିଦ ସ୍ଵପ୍ନ ଆଣେ ।
ଏବେ ଏବେ ସ୍ଵପ୍ନରେ କେବଳ
ଝିପିଝିପି ବର୍ଷା, ମହମହ ବାସ୍ନା
ଥଣ୍ଡାଥଣ୍ଡା ଜ୍ୟୋସ୍ନା, ଆଉ
ଅକଳନ ତୃଷ୍ଣା.....
ଦେଖ ତ ମୁଁ ଶୋଇଛି ତୁମ ଘରେ
ହେଲେ, ଭାସୁଛି ଆକାଶରେ.....
ପାରୁଛ ତ କବାଟଟିଏ ଲଗାଇଦିଅ
ନ ହେଲେ ମୋତେ ଦୋଷ ଦେବନି ଜମା,
ହବତ, କରିଦେବ କ୍ଷମା ।