ରକ୍ଷାବନ୍ଧନ
ରକ୍ଷାବନ୍ଧନ
ପବିତ୍ର ବନ୍ଧନ ଯେ ରକ୍ଷାବନ୍ଧନ ପର୍ବ ଓଡ଼ିଆ ଘରର ,
ଭାଇର ସୁରକ୍ଷା ଭଉଣୀର ରକ୍ଷା ଅଟେ ଯାହା ଅନ୍ତସ୍ବର ,
ଶ୍ରୀକ୍ଷେତ୍ରେ ଶ୍ରୀମନ୍ଦିର
ବଡ଼ଭାଇ ବଳଦେବ ସାନଭାଇ ମଧ୍ୟେ ଭଗ୍ନୀ କି ସୁନ୍ଦର,
ଗୋମାତା ପୂଜନ ଏ ଦିନର ।
ଭାଇଭଉଣୀଙ୍କ ବନ୍ଧନ ସୁଦୃଢ଼ ରାକ୍ଷୀ ପର୍ବ କରିଥାଏ,
ପାରମ୍ପରିକ ହିନ୍ଦୁ ପର୍ବ ଯେ ଗହ୍ମା ପୂର୍ଣ୍ଣିମା ବି କୁହାଯାଏ,
ଭାଇ ହସ୍ତେ ଭଉଣୀ
ଭାଇର ଉଜ୍ଜଳ ଭବିଷ୍ୟତ କାମ୍ୟ ଭଉଣୀଟି କରିଥାଏ
ଭଉଣୀକୁ ବି ସୁରକ୍ଷା ଦିଏ ।
ଚନ୍ଦନ ଓ ପୂଜା ସାଥୀ ହୋଇ ବସି କଥାବାର୍ତ୍ତା ହେଉଥିଲେ,
ରାକ୍ଷୀ ପୂର୍ଣ୍ଣିମାର ଗୂଢ କଥା ସବୁ ଆଲୋଚନା କରୁଥିଲେ,
ଶୁଣ୍ ସୁନାଭଉଣୀ
ବୁଝାଇ କହିବି ପବିତ୍ର ବନ୍ଧନ କେ' କା' ପାଇଁ କରିଥିଲେ ,
ଶୁଣ୍ ତାହା ମନଦେଇ ଭଲେ ।
ମୋ ସୁନା ଭଉଣୀ କହୁଅଛି ପୁଣି ତୋ ଆଗେ କଥା ରାକ୍ଷୀର,
ରକ୍ଷା ବନ୍ଧନର ଅନେକ ଘଟଣା ପୁରାଣ ଇତିହାସର,
ବଳୀ ଯେ ହୁମାୟୁନ
ସିନ୍ଧୁର ଦୁଲଣୀ ବଳି ହସ୍ତେ ରାକ୍ଷୀ ବାନ୍ଧି ସୁରକ୍ଷା ସିନ୍ଦୁର,
ଏହି ପର୍ବ ଅନେକ ଦିନର ।
ଅତ୍ୟାଚାରୀ ଶିଶୁପାଳ ବଦ୍ଧବେଳେ କୃଷ୍ଣାଙ୍ଗୁଳି କଟିଗଲେ,
ଯଜ୍ଞସମ୍ଭୁତା ଦ୍ରୋପଦୀ ପିନ୍ଧା ଶାଢ଼ୀ ଚିରି ହସ୍ତେ ବାନ୍ଧିଥିଲେ,
ଭାଇଙ୍କୁ ରକ୍ଷା କଲେ
କୁରୁସଭା ତଳେ ବିବସନା କାଳେ କୋଟି ବସ୍ତ୍ର ଯାଚିଦେଲେ,
କୃଷ୍ଣାଙ୍କ ସମ୍ମାନ ରକ୍ଷା କଲେ ।
ମାସିଡୋନିଆର ସମ୍ରାଟ ଆଲେକଜାଣ୍ଡାର ରାକ୍ଷୀ ନିମିତ୍ତ,
ପ୍ରଥମ ଥର ପାଇଁ ରାଜା ପୁରୁଙ୍କ ଠାରୁ ଥିଲେ ପରାସ୍ତ,
ତାଙ୍କ ପତ୍ନୀ ଯେ ଭଗ୍ନୀ
ଆଲେକଜାଣ୍ଡାର ପତ୍ନୀ ରାକ୍ଷୀ କରିଥିଲେ ପୁରୁଙ୍କୁ ପ୍ରେରିତ,
ନ କଲେ ଭଗ୍ନୀ ପତି ନିହତ ।
ମିଠା ପିଠାପଣା ମହମହ ବାସ ଛୁଟୁଥାଏ ଆମ ଘରେ,
କୃଷ୍ଣ ଜ୍ୟେଷ୍ଠଭ୍ରାତ ବଳଦେବ ଜନ୍ମ ହୋଇଥିଲେ ଏ ତିଥିରେ,
ଫୁଲ ଓ ଚନ୍ଦନରେ
ପୂଜା ହେବା ପରେ ପିଠାମିଠା ଭଗ୍ନୀ ଦିଏ ଭାଇଙ୍କ ପାଟିରେ ,
ପାଳିବା ଖୁସିରେ ଘରେ ଘରେ ।