ପ୍ରେମିକା
ପ୍ରେମିକା
ରାସ୍ତା କଡରୁ, ସଢା ଅଳିଆ ଗଦାରୁ
ଆବର୍ଜନା ଭିତରୁ କାଚବୋତଲ ଗୋଟାଇ
ପେଟ ଚାଖଣ୍ଡକ ପାଇଁ ଦାନା ଯୋଗାଡୁଥିବା,
କେଜାଣି କେତେ ଦିନରୁ
ନୁଖୁରା ମୁଣ୍ଡରେ ତେଲ ଟିକେ ବାଜି ନଥିବା
ଝିଅଟାର ବି ଆଖିଏ ସ୍ବପ୍ନ ।
ଆସନ୍ତା କି ଜଣେ ରାଜକୁମାର
ହାତଧରି କରନ୍ତା ନିଜର
ସାଜନ୍ତା ସେ ପ୍ରେମିକା....
ଅଜଣା ସୌଦାଗରର ॥
ରାତ୍ରିର ବତି ସବୁ ଲିଭିଗଲା ପରେ
କେଉଁ ଏକ ରୂପନଗରୀର ନିବୁଜ କୋଠରିରେ
ମଣିଷ ମାଂସ ଖିଆ ମହିଷାସୁର କୋଳରେ
ନିଜକୁ ହଜାଇ ଦେଉଥିବା ରୂପସୀ ବି ସ୍ବପ୍ନ ଦେଖୁଛି.....।
ସତ ଜୀବନରେ ସାଜନ୍ତା କି ପ୍ରେମିକା କାହାର !
ଦେହର ମହୁ ବଦଳରେ ବାଣ୍ଟି ଚାଲନ୍ତା
ଭଲପାଇବାର ମିଠା ମିଠା ମହୁ ସବୁ ॥
ଅନେକ ବିଶ୍ବାସ ଆଉ ସ୍ବପ୍ନ ଭରିଦେଇ
ମନ ସହିତ ଦେହଟାକୁ ଚୋରାଇ ନେଇଥିବା
ପରଦେଶୀର ବାଟକୁ ଚାହିଁ ରହିଛି
ଆଜି ବି ସୁକୁମାରୀ କୁଆଁରୀକନ୍ୟା ।
ରୁତୁ ପରେ ରୁତୁ ଆସୁଛି ଯାଉଛି.....
କାହିଁ ଆସୁନି ତ ପରଦେଶୀ ଆଉ !!!
ତଥାପି...
ଆଖିର ସପନକୁ
ଛାତିର ସ୍ପନ୍ଦନକୁ
ଆଉ..
ପହିଲି ପ୍ରେମର ସ୍ମୃତି ଟିକକକୁ ସାଥିରେ ନେଇ
ଚାହିଁ ରହିଛି ସେ, ଫେରିବା ବାଟକୁ...
କାହିଁକି ନା... ସେ ବି ତ ଗୋଟେ ପ୍ରେମିକା ॥