ଜୟ ଜଗନ୍ନାଥ ସ୍ୱାମୀ

ଆଉ କେତେ ଦୁଃଖ ରଖିଛ ଠାକୁରେ

   ମୋହରି କପାଳେ ଲେଖି

ତୁମରି କରୁଣା   ମୋ ପାଇଁକି ଉଣା

   କୁହ ତୁମେ ଚକା ଆଖି

ବଡ଼ ଦାଣ୍ଡେ ତୁମ   ଯାତରା ଲାଗିଛି

   ଭକ୍ତ   ହୁଏ  ଭିଡା  ଭିଡ଼ି

କାହିଁ କେତେ ବେଳୁ  ଅନାଇ ବସିଛି

   ଆସିବ  ରଥରେ  ଚଢ଼ି

ସଂସାର ଦେଇଛ   ଜଞ୍ଜାଳ ଦେଇଛ

   ଦେଇନ ସହିବା ଶକ୍ତି

ବେଳୁ ବେଳ ଆଜି   ଜୀବନ ଯନ୍ତ୍ରଣା

   ପରାଣ ଦେଉଛି ଝାସି

ଡାକି ଡାକି ମୁହିଁ     ଗଲିଣି ମୁଁ ଥକି

   କଣ୍ଠ ମୋ ଗଲାଣି ଶୁଖି

ଏଡ଼ିକି ନିର୍ଦୟ     ହେଲ କି ଠାକୁରେ

  ମୋ ଦୁଃଖ ପାରୁନା ଦେଖି

କୋଟି ପରମାୟୁ    ମାଗୁ ନାହିଁ ପ୍ରଭୁ

     ମାଗୁ ନାହିଁ ମୁକ୍ତା ମଣି

ଦର ପୋଡ଼ା ଭାତେ ପେଟ ମୋ ପୁରୁଛି

    ରକ୍ଷା କର ଚକ୍ର ପାଣି