ଘର ବାହୁଡ଼ା

ଆଜି ଅଛେ କାଲି ଡ଼ାକରା ଆସିବ

ବାହୁଡ଼ିବା ନିଜ ଘର

କେତେଦିନ ଆଉ ଭଡ଼ାଘରେ ଥିବା

କିଏବା ଏଠି ନିଜର ।

ଆସିଥିଲେ ଏକା ଯିବା ଏକା ଏକା

ସେ ଘର ତ ଆପଣାର

କାହାକୁ ସାଙ୍ଗରେ ନେବାକୁ ହେବନି

କରି ଦେଇଯିବା ପର ।

ବାହୁଡ଼ିବା ଆଗୁ ଯେତକ କରମ

ବାକି ସବୁ ଅଛି ରହି

ସମୟ ଥାଇ କି କରିଦେଲେ ଭଲ

ପଛେ କହିବେନି କେହି ।

ଯେତେ ଅହଂକାର ଯେତେ ଅଭିମାନ

ମନରୁ ଦେଇ ଦୂରେଇ

କିଛି ପ୍ରେମ ସ୍ନେହ ବାଣ୍ଟିଦେଇ ଯିବା

ସମସ୍ତଙ୍କୁ ଆପଣେଇ ।

ଲୋଭ ମୋହ କେବେ ନରଖିବା ମନେ

ଗଲାବେଳେ ଥିବ ଶାନ୍ତି

ସଂସାରର ସବୁ ବୋଝକୁ ମୁଣ୍ଡେଇ

ହେବାନି ଜମାରୁ କ୍ଳାନ୍ତି ।