ଆଉ ଥରେ ଜନ୍ମ ନିଅ ହେ କୃଷ୍ଣ

ଧର୍ମ ସଂସ୍ଥାପନା ପାଇଁ ଯୁଗେଯୁଗେ

ଜନମ ନିଅ ବିଭିନ୍ନ ରୂପରେ

ଦୁଷ୍ଟ ନିବାରଣ ସନ୍ଥର ପାଳନ

ସୃଷ୍ଟିକର୍ତ୍ତା ବୋଲି ସୃଷ୍ଟି ରକ୍ଷାରେ ।

ଦ୍ବାପରରେ ସିନା ଗୋଟିଏ ଦୌପଦୀ

ମାନ ରଖିଥିଲ ହେ କୃଷ୍ଣ ତୁମେ

ଆଜି ଏଯୁଗରେ ସହସ୍ର ଦୌପଦୀ

ଲଜ୍ଜା ପାଇଁ କାନ୍ଦି ମରଣ ମୁହେଁ ।

ପାଣ୍ଡବଙ୍କ ପାଇଁ ଦୁର୍ଯ୍ୟୋଧନ ଭାଇ

ଯେତେ ଗଢ଼ୁଥିଲା ମରଣ ଯନ୍ତା

ଅଶେଷ କରୁଣା ଢ଼ାଳିଦେଇ ପ୍ରଭୁ

ତୁମେ ସାଜୁଥିଲ ରକ୍ଷା କରତା ।

କହି ହେଉନାହିଁ ସହି ହେଉନାହିଁ

ମୁଣ୍ଡ ଟେକେ ଆଜି ଯେତେ ଚକ୍ରାନ୍ତ

ଅନ୍ତର୍ଯ୍ୟାମୀ ତୁମେ ସବୁ ଜାଣି ପାର

ନିବାରଣ କର ଆସି ମରତ ।

ଅନ୍ୟାୟ ଅନୀତି ବଢ଼ାଏ ତା' ଖ୍ୟାତି

ସତ୍ୟ ଧର୍ମ ଆଜି ତା' ପାଖେ ବନ୍ଧା

ତୁମେ ନଆସିଲେ କିଏ ମୁକାଳିବ

ଦୁଷ୍ଟ ଦୁରାଚାରୀଙ୍କୁ ଦେଇ ବାଧା ।

ତୁମ ମୁଖାମୃତ ଗୀତା ବାଣୀ ତତ୍ତ୍ବ

ବୁଝି ବି ଅବୁଝା ହୁଏ ମଣିଷ

ପ୍ରତ୍ୟକ୍ଷରେ ଆସି ସକଳ ହୃଦୟେ

ଭରି ଦିଅ ଟିକେ ପ୍ରେମ ପରଶ ।

ଆଉ ଥରେ ଜନମ ନିଅ ହେ କୃଷ୍ଣ

କରେ ବିନତି ଶ୍ରୀରଙ୍ଗା ଚରଣେ

ସତ୍ୟ ଧର୍ମ ନ୍ୟାୟ ବିରାଜି ମହୀରେ

ସୁଖରେ ନିବାସ କରନ୍ତୁ ଜନେ ।