ଆଜି ପରା ଛାଡ଼ଖାଇ
ଆଜି ପରା ଛାଡ଼ଖାଇ
ପ୍ରଦୀପ ଜାଳିଲି ପଞ୍ଚୁକ ପାଳିଲି
ପୂଜୁଥିଲି ଭାବଗ୍ରାହୀ,
ଜନମ ମରଣ ମାୟା କବଳରୁ
ମୋକ୍ଷ ପ୍ରାପ୍ତି ଆଶା ନେଇ,
ଡ଼ାକୁଥିଲି ପ୍ରଭୁ ସାଇ ।
ପିନ୍ଧିଲି ଗେରୁଆ ଖାଇଲି ଅରୁଆ
ମଥାରେ ତିଳକ ନାଇ,
ଦାନ ଦୟା ଧର୍ମ କଲି ସବୁ କର୍ମ
ହରିନାମ ଗାଇ ଗାଇ,
ରାତି ଗଲା ମୋର ପାହି ।
ଶୁଣି କା' ଶବଦ ଭାଙ୍ଗିଗଲା ନିଦ
ଦେଖିଲି ଘନିଆ ଭାଇ,
ଆସନ୍ତୁ ବଜାର ଧରିକି ହଜାର
କାନେ ଗଲା ମୋର କହି,
ଆଗରେ ଯାଉଛି ମୁହିଁ ।
ପାରିଲିନି ଜାଣି ଡାକିଲି ଘରଣୀ
ଚାହା କପେ ଆସ ନେଇ,
ସକାଳୁ ଘନିଆ କଲାଣି ଛାନିଁଆ
କଥାଟେ ଦିଅ ବୁଝାଇ,
ଚିଠା ଦେଲା ହାତେ ଥୋଇ ।
କୁକୁଡ଼ା ସହିତ କଙ୍କଡା଼ ଆଣିବ
ସାଥେ ଦେଢକିଲୋ ରୋହି,
ବୋକାଟେ ପରିକି ଆଁ ଟେ କରିକି
ଶୁଣୁଥିଲି ମନ ଦେଇ,
ପଞ୍ଜିକା ବହିକୁ ଚାହିଁ ।
ଦେଖିଲି ତାରିଖ ସରିଛି କାର୍ତ୍ତିକ
ଆଜି ପରା ଛାଡ଼ଖାଇ ।