मृदगंध पावसाचा

श्रावण मास घेऊन येतो

आकाशात ढग घनघोर,

 वारा येई‌ घेऊन वेचून

थेंब टपोरे धरणीवर !

श्रावणाची रिमझिम सर

क्षणात मोसम मस्त होतो,

येतो मृद्गंध पावसाचा

श्वासाश्वासात भरून जातो !

अवचित इंद्रधनूतुनी

कधी‌ बिजलीचा बाण सुटे,

जशी बावरली वेडी राधा

माझा कान्हा हरवला कुठे !

हिरवळीची नेसून साडी

जशी नवरी सृष्टी सजते,

पक्षी किलबिल वृक्षावरी

आनंदाची लहर उठते !

खळखळ वाहणार्या नद्या

दिसती आवखळ तरूणी,

मनाला मोहवित जाते

पर्वतरांगा मधून झरणी !

प्रत्येक अंगणात अनेक

रंगीबेरंगी फुले फुलती,

उत्साह भरून जातो नवा

छोटी फुलपाखरे झुलती !

मोर नाचतो अती आनंदे

कुहूकुहू करतो कोकीळ,

कृष्णाच्या अधरी मुरलीचे

सूर येती कितीरे मंजुळ!

निसर्गाचा अनमोल ठेवा

रंग प्रेमाचे सांगतो थेट,

आनंद द्या आनंद मिळेल

जीवनी होते सृष्टीची भेट !!