बहर प्रेमाचा.........
बहर प्रेमाचा.........
1 min
292
शिशिराची सोसूनी पानगळ
वसंत होऊन फुलण्याचा,
साऱ्या ऋतूत जपावा
हा बहर खऱ्या प्रेमाचा!
स्पर्शाविनाही झंकारावी
वीणा अशी अलवार ,
बरसात सुरांची व्हावी
तू छेडताच मल्हार!
मौनातून उलगडावे
अव्यक्त भाव अंतरीचे ,
नजरेतून व्यक्त होता
स्वर उमलावे मुरलीचे!
घन ओथंबून येता
श्रावणसर ओघळावी,
चिंब चिंब देहावर
खूण थेंबाची उमटावी!
ऋतु पुनः यावा फुलोनी
जणू नियम निसर्गाचा ,
हळव्या सांजवेळी पुनः
हृदयात बहर प्रेमाचा!