പ്രേമാഭ്യർത്ഥന

ആ ദിവസം ഇന്നത്തേ പോലെ ഓർക്കുന്നു...

അവർ നാലു പേരും കോളേജിലേക്കുള്ള ഇടവഴിയിലൂടെ നടന്നു വരുന്നു അവരുടെ സംസാരം ഞങ്ങൾ കൂട്ടുകാരുടെ ഭാഷയിൽ "കാക്കക്കൂട്ടിൽ ചീവീടുകളുടെ ശബ്ദം" എൻ്റെ ചെവിയിൽ മുഴങ്ങിയത് മധുരമുള്ള ഗാനം പോലെയാണ്.. ആ കൂട്ടത്തിൽ അന്ന് ആദ്യമായി അവളുടെ മുഖവും അവളുടെ നടത്തവും അവളുടെ സ്വരവും എല്ലാം പുതുമയോടെ എനിക്ക് അനുഭവപ്പെട്ടു... നെറ്റിയിൽ ചന്ദനകുറി ചാർത്തി ചന്ദനനിറമുള്ള(ഐവറി) വസ്ത്രമിട്ട് അവൾ നടന്നു വരുന്നത് മേഘങ്ങളിലൂടെ ഒരു നക്ഷത്രം ഇറങ്ങി വരുന്ന പോലെ തോന്നി.. ആ നടത്തവും, ആ ചിരിയും എൻ്റെ ഹൃദയത്തിൻ്റ ഉള്ളറകളിലേക്ക് ആഴ്ന്നിറങ്ങി.

അത് ഒരു ഡിസംമ്പർ 1ആം തിയതി ആയിരുന്നു. ക്ലാസ്സിൽ വച്ച് അവളുടെ ചലനങ്ങളും, സംസാരവും, ചിരിയും ഹൃദയത്തിൻ്റെ ഒരോ താളുകളിൽ പതിഞ്ഞു കൊണ്ടേ ഇരുന്നു. അന്ന് ക്ലാസ്സ് കഴിഞ്ഞ് അവൾ പോവുന്നതു വരെ അവളുടെ ചലനങ്ങൾ എൻ്റെ ഹൃദയം ഒപ്പിയെടുത്തു. അടുത്ത ദിവസം എൻ്റെ കണ്ണുകൾ അവളെ തേടിയെങ്കിലും അവൾ ക്ലാസ്സിൽ വന്നില്ല. അന്ന് കാത്തിരിപ്പിൻ്റെ സുഖവും വേദനയും മനസ്സിലായി. കൂട്ടുകാരോടൊപ്പം ചിരിച്ചും കളിച്ചും അൽപ്പം ക്ലാസിൽ ശ്രദ്ധിച്ചും ആ ദിനം കഴിച്ചു കൂട്ടി. ഡിസംമ്പർ മൂന്നാം തിയതി ചക്കുളത്ത്കാവ് പൊങ്കാലയുടെ അവധി. വീട്ടിൽ അന്ന് പകലും രാത്രിയും അവളുടെ ചലനങ്ങൾ വീ ണ്ടും വീണ്ടും എൻ്റെ കൺമുൻപിലൂടെ മിന്നി മറഞ്ഞു. അപ്പോഴേക്കും അവളോട് പ്രണയം തോന്നി തുടങ്ങിയിരുന്നു. ആ കൈപിടിച്ച് ബാക്കിയുള്ള ജിവിതം എന്നത് മനസ്സു കൊണ്ട് ആയിരം തവണ ഉറപ്പിച്ചു.

അടുത്ത ദിനം രാവിലെ കണ്ണ് തുറന്നപ്പോൾ തന്നേ മനസ്സിലെ സ്നേഹം അവളോട് പറയണം എന്ന് തീരുമാനിച്ച് ഉറപ്പിച്ചു. കോളേജിൽ കാലുകുത്തിയ നിമിഷം മുതൽ ക്ലാസ്സിൽ കയറുന്ന വരെ കണ്ണുകൾ പരതി. ക്ലാസ്സിൽ ചെന്നപ്പോൾ, ക്ലാസ്സിൽ കൂട്ടുകാരികളോട് ചിരിച്ച് കളിച്ച് ഇരിക്കുന്ന അവളെ കണ്ടു. ക്ലാസ്സ് തുടങ്ങിയപ്പോൾ മുതൽ മനസ്സിലുള്ള പ്രണയം അവളോട് എങ്ങനെ പറയും എന്ന ചിന്തയിൽ മുഴുകി.

ഇതിനു മുൻപ് ഇഷ്ടം പലരോട് തോന്നിയിട്ടുണ്ടെങ്കിലും പരസഹായത്തോടെ രണ്ട് പേരോട് മാത്രമാണ് പ്രേമാഭ്യർത്ഥന നടത്തിയത്. അതിൽ ഒരാൾ മാത്രമാണ് തിരിച്ചും ഇഷ്ടം പങ്കുവച്ചത്. പത്താം ക്ലാസ്സിൽ പഠിക്കുമ്പോളായിരുന്നു അത്. ആ പ്രേമം കൂടുതലും ദൂരെ നിന്നുള്ള കാഴ്ച്ചയും കത്തുകളിലൂടെയുള്ള സംവാദങ്ങളുമാരുന്നു. പിന്നീട് പരീക്ഷയടുത്തപ്പോൾ ആ പ്രേമം പതിയേ അവസാനിക്കുകയും ചെയ്യ്തു.

ഇവളോട് തോന്നുന്ന ഈ പ്രണയം എൻ്റ ചങ്ക് കൂട്ടുകാരനോട് പോലും തുറന്ന് പറയുവാൻ അപ്പോൾ മനസ്സ് അനുവദിച്ചില്ല. നൂറായിരം ചോദ്യങ്ങളും ഉത്തരങ്ങളുമായി ഉച്ചവരെ തള്ളി നീക്കി. ഉച്ചക്ക് ഭക്ഷണം കഴിക്കും മുൻപ് തന്നേ അവളോട് ഭക്ഷണശേഷം ആളൊഴിഞ്ഞ ക്ലാസിൽ വരണം ഒരു കാര്യം പറയുവാനുണ്ട് എന്ന് ഒരു വിധത്തിൽ പറഞ്ഞൊപ്പിച്ചു.

ക്ലാസ്സിൽ വാതോരാതെ ആൺപെൺ വ്യത്യാസമില്ലാതെ വായിട്ടടിക്കുന്ന എൻ്റെ തൊണ്ട ഇത്രയും പറഞ്ഞ് ഒപ്പിച്ചപ്പോയേക്കും വറ്റി വരണ്ടു. ഭക്ഷണം നിമിഷനേരം കൊണ്ട് കഴിച്ചു തീർത്ത് ചങ്ക് കൂട്ടുകാരനോട് പിന്നെ കാണാം ഒരു കാര്യമുണ്ടെന്ന് പറഞ്ഞ് പെട്ടെന്ന് തന്നെ ആളൊഴിഞ്ഞ ക്ലാസ്സിലെ ഡസ്കിൽ കയറി ഇരിപ്പുറപ്പിച്ചു.

ഉച്ചഭക്ഷണത്തിന് ശേഷം അവൾ, ഞാൻ ഇരുന്ന ക്ലാസ് മുറിയിലേക്ക് വന്നു. ചുവടുകൾ വച്ച് നടന്നു വരുന്നത് അവളാണെങ്കിലും എൻ്റെ നെഞ്ചിടിപ്പ് ഇരട്ടിയായി കൊണ്ടിരുന്നു. അവൾ ഞാനിരുന്ന ഡസ്കിൻ്റെ അരുകിലേക്ക് വന്നു. എന്ത് പറയണം എവിടെ തുടങ്ങണം എങ്ങനെ തുടങ്ങണം എന്ന് കുഴങ്ങി നിന്ന എന്നോട്,

അവൾ ചോദിച്ചു "എന്താ വരുവാൻ പറഞ്ഞത്?"

എവിടെ നിന്നെല്ലാം ധൈര്യം സംഭരിച്ച് ഞാൻ അങ്ങ് തുടങ്ങി..

"എനിക്ക് നിന്നെ ഒത്തിരി ഇഷ്ടമാണ്, ഒരു കോളേജ് പ്രേമമായിട്ടല്ല, നിന്നെ കല്യാണം കഴിച്ച് ഒന്നിച്ചുള്ള ജീവിതം ഞാൻ ആഗ്രഹിക്കുന്നു. നല്ലപോലെ ആലോചിച്ചിട്ട് എനിക്ക് മറുപടി തരണം. ജീവിതകാലം മുഴുവൻ നിന്നെ സ്നേഹിച്ച് ഒപ്പം ഉണ്ടാവും."

ഞാൻ ഇത് പറഞ്ഞൊപ്പിച്ചപ്പോൾ എനിക്കുണ്ടായ ആ നെഞ്ചിടിപ്പും വെപ്രാളവും ഒരു വിധത്തിൽ മറച്ചുവച്ച് അവളുടെ മുഖത്തേക്ക് ഞാൻ നോക്കി. ഇത് പറയുവാനാണോ എന്നെ ഇങ്ങോട്ട് വിളിച്ചേ എന്ന ഭാവത്തിൽ അവൾ എന്നെ നോക്കി. "ഞാൻ പോവാ" എന്നു പറഞ്ഞ് അവൾ തിരിഞ്ഞു നടന്നു.

ക്ലാസ്സിൽ തിരികെ ചെല്ലുമ്പോൾ അവളുടെ കൂട്ടുക്കാരികൾ തമ്മിൽ അടക്കം പറച്ചിലും കള്ള ചിരിയും ഞാൻ ശ്രദ്ധിച്ചു. ക്ലാസ്സിൽ ചെന്നിരുന്നതും നടന്ന സംഭവം ചങ്കിനോട് ഞാൻ പറഞ്ഞു. അവൻ അത് ഒരു ആശ്ചര്യത്തോടെ കേട്ടു. കാരണം എൻ്റെ മനസ്സിൽ ഇങ്ങനെ ഒരു പ്രണയം ഉള്ളതായി ഞാൻ പറഞ്ഞിരുന്നില്ല. അവൻ പറഞ്ഞു "നീ ഇത് എന്നോട് നേരത്തേ പറഞ്ഞിരുന്നേൽ ഞാൻ സമ്മതിക്കില്ലായിരുന്നു, നിനക്ക് അവള് ശരിയാവില്ല." ഞാൻ പറഞ്ഞു "ഇഷ്ടപ്പെട്ടു പറഞ്ഞു, മറ്റൊന്നും ചിന്തിച്ചിട്ടില്ല". അന്ന് ക്ലാസ്സ് കഴിഞ്ഞ് ആ പ്രേമാഭ്യർത്ഥനയുടെ ഫലം എനിക്ക് അവളുടെ പ്രിയ കൂട്ടുകാരി വന്ന് പറഞ്ഞു "ടാ! നിനക്ക് വേറെ പണിയില്ലേ.. അവൾക്ക് നിന്നെ ഇഷ്ടമല്ല."

ഒരു നിമിഷം ഇടിവെട്ടിയ ഒരു പ്രതീതി പക്ഷേ മനസ്സിൽ ഉറച്ചു പറഞ്ഞു “അവൾക്ക് എന്നെ ഇഷ്ടമാണ്..”

"സാരമില്ലെടാ, നന്നായി. നിനക്ക് ഇതിലും നല്ലത് കിട്ടും.. എന്നാലും അവൾക്ക് നിന്നെ ഇഷ്ടപ്പെട്ടില്ലെടാ.. നിന്നെ കാണാൻ അത്രക്ക് കൊള്ളില്ലേ?" എന്ന് ചങ്ക് വക ഒരു കുത്ത്.

പ്രേമാഭ്യർത്ഥനയുടെ ദിവസം "മാനസമൈന.." പാടിയ കാമുകൻമാരുടെ നിരയിൽ അങ്ങനെ മറ്റൊരു പേരുകൂടി എഴുതി ചേർത്തു.....