ಮಾರನೆ ದಿನದ ಬೆಳಿಗ್ಗೆ..

ನೆನ್ನೆ ರಾತ್ರಿ ಘಟನೆಗಳೊಳಗೆ ಬಂಧಿಯಾಗಿ

ಚಿಂತೆಗಳ‌ ಸಾಗರದೊಳಗಡೆ ಸತ್ತು ಬಿದ್ದಿದ್ದೆ I

ಬದುಕಿನ ಸಂತೆಯೂ ಎಬ್ಬಿಸಲಾಗಲಿಲ್ಲ

ದೇವರ ಸುಪ್ರಭಾತವೂ ಎಬ್ಬಿಸಲಿಲ್ಲ I

ಜಡ ಶರೀರವನ್ನೆಬ್ಬಿಸಲು ಎಷ್ಟು ಹೋರಾಟ

ಮೈಕು, ಬುಕ್ಕು, ಹೇಳಿಕೆ, ಉಪದೇಶವೆಷ್ಟು? I

ಬಂದವರೆಷ್ಟು ಹೋದವರೆಷ್ಟು ಲೆಕ್ಕಗಳಿಲ್ಲ

ಎಬ್ಬಿಸಲಾರದೆ ವಾಪಾಸು ಹೋದವರೇ..I

ಕಡಿಮೆ ಪಕ್ಷ ನಡೆಯಲೂ ಮಾಡಿದ ಪ್ರಯತ್ನ

ಬದುಕ ಅರಳಿಸಲು ಏನೇನೋ ಯತ್ನಗಳು I

ಆದರೆ ಮೂಡಣದರಮನೆಯ ಬೆಳಕಿನ ಕಿರಣ

ಮಂಜಿನೊಡಲಲಿ ಮಿಂದ ಹಸಿರಿನ‌ ಲೋಕದಲಿ I

ಮುಂಜಾನೆಯ ಹಕ್ಕಿಗಳ ಚಿಲಿಪಿಲಿ ಇಂಚರಗಳು

ಸತ್ತಿರಬಹುದಾದ ನನ್ನನ್ನು ಮತ್ತೆ ಬದುಕಿಸಿದವು I