Hathi or chinti ki dosti

Kaha ho baccho!

Aaj suno Yogi Haathi aur Chinki Cheenti ki kahani.

Ek samay ki baat hai, ek ghane jangle mein Yogi naam ka ek vishal haathi rehta tha. Ek din wo nadi ki taraf ja raha tha, tab usne raste mein ek choti si cheenti ko dekha.

Cheenti ne kaha, "Bhai Haathi, madad karo, mujhe nadi tak pahuncha do, bahut pyaas lagi hai."

Haathi ne apni suund se pyaar se use uthaya aur nadi kinaare pahuncha diya. Cheenti ne khush hokar kaha, "Shukriya! Kabhi zarurat pade toh main bhi tumhari madad karungi."

Ye sunkar Haathi hasne laga, "Tu itni choti si, meri kya madad karegi?"

Cheenti chup rahi.

Kuch din baad, ek shikari ne jangle mein jaal bichaya. Bechara Yogi Haathi us jaal mein phas gaya aur jor-jor se cheenkhne laga.

• Wahi choti Cheenti ne uski awaaz sun li. Usne turant apni hazaaron saheliyon ko bulaya.

Sab cheentiyon ne milkar shikari par hamla kar diya. Shikari ke pairon mein itna kaata ki wo dard se chilla kar bhaag gaya.

Cheentiyon ne jaal ke rasse ko bhi kaat diya. Haathi aazaad ho gaya.

Haathi ne sharminda hokar kaha, "Mujhe maaf kardo, Chinki. Aaj samajh aaya, koi chota bada nahi hota. Saccha dost wahi jo musibat mein kaam aaye."

Tab se dono mein gehri dosti ho gayi.

*MORAL:* Ghamand nahi karna chahiye aur dost chota ho ya bada, sabki izzat karni chahiye , kisi ko chota nhi smjhna chahiye.