બગલાનું વચન
બગલાનું વચન
એક સુંદર જંગલ હતું. આ જંગલમાં એક મોટું તળાવ આવેલું હતું. જંગલના બધા પ્રાણીઓ આ તળાવમાં પાણી પીને પોતાની તરસ છીપાવતા હતા. આ તળાવમાં કાચબા, બતક, હંસ અને કેટલીક માછલીઓ પણ રહેતી હતી. આ તળાવમાં એક બગલો પણ રહેતો હતો. તેની નામ હતું બલ્લુ.
બલ્લુ બગલાને એક ખરાબ ટેવ હતી. આ બલ્લુ બગલો તળાવમાં જ્યાં રહેતો હતો. ત્યાં ખુબ જ ગંદકી કરતો હતો. તે જમ્યા પછી પોતાની ચાંચ પણ સાફ કરતો નહિ. કલ્લુ નામનો કાચબો આ બગલાનો મિત્ર હતો.
આ કલ્લુ કાચબો ઘણો જ સમજદાર હતો. તે ઘણીવાર પોતાના મિત્ર બલ્લુ બગલાને સમજાવતો કે, ‘તું આમ તળાવમાં ગંદકી ફેલાવે તે યોગ્ય ન કહેવાય. તને ખબર છે તળાવના બધા જ પ્રાણીઓ આ પાણી પીએ છે. અને તું આ પાણી ગંદુ કરે છે. ગંદુ પાણી પીવાથી બધાં બિમાર પડે.’
પણ બલ્લુ બગલો કલ્લુ કાચબાની વાત માનતો નહિ. તે કહેતો,’ હું તો વર્ષોથી આમ જ કરું છું. હું તો કોઈ દિવસ બિમાર પડતો જ નથી. તું મને આમ ખોટો ઉપદેશ ન આપ.’ આમ કહી બલ્લુ એ ક્લ્લુંની વાત ટાળી દીધી.
હવે એક વખત બલ્લુ બગલાએ તળાવને કિનારે પોતાનો ખોરાક સંતાડી દીધો. વધારે દિવસો પસાર થવાથી બલ્લુ બગલાનો આ ખોરાક સડીને બગડી ગયો. અને તેના લીધે તળાવનું પાણી પણ ગંદુ થવા લાગ્યું. પણ બલ્લુ એ આ વાતની જાણ કોઈને કરી નહિ. પોતાના મિત્ર કલ્લુ કાચબાને પણ નહિ. પછી તો જે જે લોકોએ તળાવનું આ ગંદુ પાણી પીધું તે બધા બિમાર થવા લાગ્યા. તળાવની માછલીઓ એ તપાસ કરી તો ખબર પડી કે ગંદકીની શરૂઆત બલ્લુ બગલાના ઘરેથી થઈ છે.
તળાવની બધી માછલીઓ ભેગી થઈને તળાવના મુખી મગરભાઈ પાસે ગઈ. અને બધી વાત કરી. આ બધી વાત સંભાળીને મગર મુખી તો ગુસ્સે થઈ ગયો. એતો તરત બધાને લઈને પહોચ્યો બલ્લુ બગલાને ઘરે. ત્યાં જઈને જોયું તો બલ્લુ બગલો પોતે જ ખૂબ જ બિમાર થઈ ગયો હતો. આ જોઈને કલ્લુ કાચબાએ તરત જ ડોક્ટર દેદાકાભાઈને બોલાવ્યા. અને બલ્લુ બગલાની સારવાર ચાલુ કરાવી.
થોડા દિવસ પછી જયારે બલ્લુ બગલો બરાબર સાજો થઈ ગયો. પછી મગર મુખીએ તેને બોલાવ્યો અને સમજાવ્યો, ‘જોયું બલ્લુ તને કલ્લુ એ સમજાવ્યો કે તું ગંદકી ના કર, પણ તે કોઈની વાત માણી જ નહિ. અને આજે ગંદકી કરવાનું પરિણામ તારે જ ભોગવવાનું આવ્યું.’
બલ્લુ બગલો શરમાઈને બોલ્યો, ‘મગરભાઈ તમારી વાત એકદમ સાચી છે. મે આજ સુધી સ્વચ્છતાનું મહત્વ ન સમજ્યું. પણ આજે જયારે હું પોતે બિમાર પડી ગયો, ત્યારે મને સ્વચ્છતાનું મહત્વ સમજાયું.’
બલ્લુ બગલાએ બધાને વચન આપ્યું કે તે આજ પછી ક્યારેય તળાવમાં ગંદકી નહિ કરે.