રાધાનું નામ લઈ

કોણે રે છાનું છાનું આવીને આજ

મારા માથા પર મોરપીંછ ખોસ્યું !

ને પછી રાધાનું નામ લઈ મનડું રંગ્યું..!

 રંગભરી પગલીઓ માંડી ઉમંગે ને

અવનવી ભાત ગૂંથી શણગાર્યું આંગણ.

મટુકીમાં હેત ભરી પારણિયે રોપીને

સુગંધી શ્વાસે રે વિસ્તારું પ્રાંગણ.

કોણે રે આછું આછું શમણું સજાવી

મારા કાળજળે પ્રેમબાણ છોડ્યું. ? 

કોણે રે છાનું છાનું આવીને આજ

મારા માથા પર મોરપીંછ ખોસ્યું ? 

ઊંચે આભે રે દીઠી ચાંદ શી હૂર કંઈ

 વાદળપંખી થઈ વીજહિંડોળે ઝૂલે.

ગુલમ્હોરી સ્મિત જ્યાં પહેર્યું મુખે કે

મીઠાં સ્મરણોનાં પરબીડિયા ખૂલે.

કોણ રે આવીને કાલું કાલું મારા  

કાનોમાં વ્હાલપ નીતરતા વેણ બોલ્યું ?

કોણે રે છાનું છાનું આવીને આજ

મારા માથા પર મોરપીંછ ખોસ્યું ?