Library
ઈશ્વર અને આત્મા વચ્ચેનો સંવાદ
ઈશ્વર અને આત્મા વચ્ચેનો સંવાદ
કહ્યું' તું તમે ખૂબ જ સુંદર છે આ દુનિયા,
હાં, સાચે જ ખૂબ જ સુંદર છે આ દુનિયા !
આ સુંદરતાને આંખોમાં સમાવી મહેસૂસ કરજે,
પણ આ સુંદરતાની પાછળ લલચાઈશ નહીં !
કહ્યું' તું તમે અવનવાં સંબંધો બંધાશે આ દુનિયામાં,
હાં, સાચે જ ઘણાં નવાં સંબંધો બંધાયા છે આ દુનિયામાં !
આ સંબંધોને ઈમાનદારી પૂર્વક હૃદયથી નિભાવજે,
પણ આ સંબંધોની મોહમાયામાં ફસાઈશ નહીં !
કહ્યું' તું તમે મળશે સુખ અને વૈભવ આ દુનિયામાં,
હાં, સાચે જ છે અપાર સુખ અને વૈભવ આ દુનિયામાં !
આ સુખ અને વૈભવને પૂરા મનથી માણજે,
પણ આ સુખ અને વૈભવનાં નશામાં છકી જઈશ નહીં !
કહ્યું' તું તમે મળશે ઘણાં રસ્તાઓ આ સફરમાં,
હાં, સાચે જ મળ્યા છે ઘણાં રસ્તાઓ આ સફરમાં !
આ બધાં જ રસ્તાઓને ધ્યાનપૂર્વક સમજજે,
પણ આ રસ્તાઓની વચ્ચે ગૂંચવાઈશ નહીં !
કહ્યું' તું તમે આવશે ઘણી મુશ્કેલીઓ આ જીવનમાં,
હાં સાચે જ આવી છે ખૂબ જ મુશ્કેલીઓ આ જીવનમાં !
આ મુશ્કેલીઓનો હિંમતપૂર્વક સામનો કરજે,
પણ આ મુશ્કેલીઓથી ગભરાઈશ નહીં !
