ପ୍ରେମ : ଏକ ଆଲେଖ୍ୟ
ପ୍ରେମ : ଏକ ଆଲେଖ୍ୟ
ତନ୍ଦ୍ରାଭରା ଅନ୍ୟମନସ୍କତାରେ
କ୍ଷୁଦ୍ର ଆବେଗ, ଭାବ ବିହ୍ୱଳତାରେ
ପ୍ରଜାପତି ଓ ପକ୍ଷୀଙ୍କ ମେଳରେ
ଅବଚେତନାର ବାତାୟନ ଖୋଲେ
ଅନ୍ତରଙ୍ଗ ସହାନୁଭୂତିର ସ୍ପର୍ଶ
କଥା କଥାକେ କରେ ବିମୋହିତ
ପ୍ରେମ : କାରୁଣ୍ୟ ଏବଂ ଉଦ୍ଦୀପକ ।
କେବେ କେମିତି କଲ୍ପନାରେ
ଅଳସ ଭାଙ୍ଗିବା ବେଳରେ
ଦର ଆଉଜା କବାଟ ଫାଙ୍କରେ
ତୁମକୁ ଦେଖି ହୁଏ ରୋମାଞ୍ଚିତ
ସାମାନ୍ୟ ନୀରବତା ସବୁକୁ ଭାଙ୍ଗି
ମାର୍ମିକ ଭଲ ପାଇବାର ଶିଳାଲେଖ
ପ୍ରେମ : ଗତିଶୀଳ ଅମୋଘ ଅସ୍ତ୍ର ।
ବିଶ୍ଵାସ ରଖି ସିଧା ସଳଖ କଥାରେ
ମର୍ମ ବିଦାରକ ନିଷ୍ଠୁରତାରେ
ଭୀତିପ୍ରଦ ଶୁନ୍ ଶାନ୍ ରାସ୍ତାରେ
ଏକାକାର କରି ଆକାଶ, ପାତାଳ
ପାହାଡ- ସମୁଦ୍ରର ଆଲିଙ୍ଗନ ବେଳେ
ଡହ ଡହ ବାସ୍ତବତାର ଇସ୍ତାହାର
ପ୍ରେମ : ଚିରନ୍ତନ, ସାକାରିଭୂତ ।
ପ୍ରେମ ତୁମେ , ଅଧିକାରିଣୀ ପ୍ରେମର
ନିରାଶାରେ ଜୀବନ, ଆଶାର ନିଃଶ୍ଵାସ
ଓଲଟାଅ ଅନେକ ପୃଷ୍ଠା ଜୀବନର
ଶୀତ, ନିଦାଘରେ ଦେଇ ବସନ୍ତ ପରଶ ।