ଆମର କୋଶଲ୍
ଆମର କୋଶଲ୍
କିଏ କହୁଛେ ନାଇ କୋଶଲ ରାଏଜ୍
ମାରୁ ଛନ୍ ଖାଲି ପରେ ଢାବା
କୋଶଲ୍ ଭାଏ ବହେନ୍ ଏକ ହେଲେଗା
କାଏଁଯେ କୋଶଲ ରାଏଜ ନାଇହେବା ॥
ଗାଏମା କୋଶଲ୍ ଲେଖମା କୋଶଲ୍
କେନ୍ତାନାଇ ହେବା ଦେଖମା
କାଏଁ ନାଇ ହେବା କୋଶଲ ରାଏଜ୍ ପିଲେ
ସାଙ୍ଗେ ଅଛେ ପରେ ଆମର ମାଁ ॥
ଆସରେ କୋଶଲ ଭାଏ ବହେନ ଆସ
କୋଶଲ ରାଏଜ କେ ମୁକଲାମା
ଆମର ସବକରର୍ ଏକତା ହେଲେ ଗା
କୋଶଲ୍ କେ ଆଗକେ ବଢାମା ॥
ନାଇ ପାସରୁଁ ଆମେ ଆମର ଗୀତ୍
ରସରକେଲି ଆରୁ ଡାଲଖାଇ
ବଂଚାମା ଆମେ ଆମର ବଜା ବାଜନା
ଢୋଲ୍ ନିଶାନ୍ ଆରୁ ମୁହୁରୀଇ ॥
କୋଶଲ ରାଏଜର ନା ରଖମା ଆମେ
ଲେଖମା କୋଶଲ କବିତା
କୋଶଲ ଭାଷାକେ ଆମେ ଉଚା କରମା
ପାଏବା ଆମର ଭାଷା ମାନ୍ୟତା ॥
ନାଇ ବୁଡଉଁ ଆମେ ଅମର ଲୋକକଲା
କବିତା,ନାଚ ଆରୁ ଗୀତ୍
ଆଗକେ ବଢାମୁ ଆମର କଲା କେ ଗା
କୋଶଲର ମାଏନ ବଢାବା ଦୁଇଭିତ୍ ॥