ଦିନ ଯେବେ ସରି ଆସେ
ଦିନ ଯେବେ ସରି ଆସେ
ଦିନ ଯେବେ ସରି ଆସେ ସରିଯାଏ ଜୀବନ,
ଆଉ କି ସମୟ ଥାଏ ଦେଖିବାକୁ ସପନ !!
ମୋର ତ ପଡିଛି ଦିନ ଭୋଗିବାକୁ ଆୟୁଷ
ଦାମ୍ଭିକର ଏକଥା ବି ତୁଚ୍ଛ ଆଉ ନିମିଷ |
ଦେଖ ସୂର୍ଯ୍ୟ ଢଳି ଯାଏ ଆଗାମୀର କୋଳରେ
"ଆଜିଟି" ଯାଉଛି ହଜି ଆୟୁଷର ସୁଅରେ |
ଆସିଥିଲି କାହିଁକି ମୁଁ ବୁଝିଲି କି ସେ କଥା
ପାରିଲିନି କରି ବୋଲି ପାଉଛି କି ବ୍ୟଥା ?
ହେ ସୂର୍ଯ୍ୟାସ୍ତ ଦେଇ ଯାଆ ପ୍ରତିଶ୍ରୁତିଟିଏ
ଆଜି ରାତିରେ ଆସିବ ନୂଆ ସ୍ବପ୍ନଟିଏ |
ଦିନକ ପାଇଁ ହେଲେ ବି ଦେବି ରଙ୍ଗ ସେଥିରେ
ବୁଝିଯିବି ଜୀବନର ଲକ୍ଷ୍ୟ ସେଇ ସ୍ବପ୍ନରେ |
ଦିନ ଯେବେ ସରିଯାଏ ଗୋଧୂଳିକୁ ଛୁଇଁ
ମୋ ମନରେ ସ୍ବପ୍ନସବୁ ଆସୁଥାନ୍ତି ଉଇଁ |
ରୂପସୀ ଗୋଧୂଳି ଦିଶେ ନବବଧୂ ସମ
ଶେଷ ଲଗ୍ନ ବି ହୋଇପାରେ ମଧୁରତମ !!