ଆନମନା ହୁଏ ମେଘ

 

   ମଣିଷ ଉଜାଡେ ବଣଜଙ୍ଗଲକୁ

   ଝଡ ଉଜାଡଇ ତୋଟା

   ଗଛ ନାହିଁବୋଲି ଋତୁ ବାଟବଣା

   ମେଘ କରେ ହଟହଟା

   ମଉଷୁମୀ ଆସି ରୁଷିଯାଏ ସତେ 

   ବଉଦ ରୋଷଣୀ କାହିଁ

   ଆଷାଢ ମାସରେ ଖରା ହୁଏ ଟାଣ

   ତାତିକୁ ହୁଏନି ସହି

    ଝଡ ଆସି ପୁଣି ଝଡ ଚାଲିଯାଏ 

    ଚଉଦିଗ ଖାଲିଖାଲି

    ଗଛ ନାହିଁବୋଲି ମଉଷୁମୀ ମେଘ

    ବାଟ ସତେ ଯାଏ ଭୁଲି

    ବଈଶାଖ ମାସେ କାଳବଈଶାଖି

    ଅଦିନିଆ ମେଘରଡି

    ଆଷାଢ ମାସରେ ନିର୍ମଳ ଆକାଶ

    ବରଷା ଯାଉଛି ଉଡି

    ଡାଳୁଆ ଧାନରେ ପାଣି ପସିଯାଏ

    ବରଷା ଉଜାଡେ କ୍ଷେତ

    ଆଷାଢ ମାସରେ ଧାନ ଗଜା ସବୁ

    କ୍ଷେତରେ ହେଉଛି ଖତ

    ଧାରାଶିରାବଣ ଆଖିକୁ ସପନ

    ଶୁଖଇ ଗହୀର ବିଲ

    ଗଛ ନାହିଁବୋଲି ଆନମନା ମେଘ

    ଚାଷୀ ହୁଏ କଲବଲ ।