IMPACT OF SOCIAL MEDIA

നമ്മൾ സോഷ്യൽ മീഡിയ ഉപയോഗിക്കുകയാണോ... അതോ സോഷ്യൽ മീഡിയയാണോ നമ്മളെ ഉപയോഗിക്കുന്നത്?

ഈ ഒരു ചോദ്യം കൊണ്ടാണ് ഞാൻ എന്റെ വിഷയം ആരംഭിക്കുന്നത്.ഒരു ദിവസം നമുക്ക് മൊബൈൽ ഫോൺ ഇല്ലാതെ കഴിയാൻ കഴിയുമോ? രാവിലെ കണ്ണ് തുറന്ന ഉടനെ പലരും ആദ്യം നോക്കുന്നത് ഖുർആനോ, പത്രമോ, കുടുംബാംഗങ്ങളുടെ മുഖമോ അല്ല... മറിച്ച് മൊബൈൽ ഫോണിലെ നോട്ടിഫിക്കേഷനുകളാണ്.

നമ്മൾ ലോകവുമായി കൂടുതൽ ബന്ധപ്പെടുന്നു എന്ന് കരുതുന്നു. എന്നാൽ ഒരു നിമിഷം ചിന്തിച്ചുനോക്കൂ... നമ്മൾ ലോകത്തോട് കൂടുതൽ അടുത്തോ, അതോ നമ്മുടെ സ്വന്തം കുടുംബത്തിൽ നിന്ന് കൂടുതൽ അകലെയോ?

സോഷ്യൽ മീഡിയ മനുഷ്യരാശിക്ക് ലഭിച്ച ഏറ്റവും ശക്തമായ ഉപകരണങ്ങളിൽ ഒന്നാണ്. അത് അറിവ് നൽകുന്നു, ആളുകളെ ബന്ധിപ്പിക്കുന്നു, അവസരങ്ങൾ സൃഷ്ടിക്കുന്നു. എന്നാൽ അതേ സമയം അത് നമ്മുടെ സമയം, ശ്രദ്ധ, സ്വകാര്യത, ചിലപ്പോൾ നമ്മുടെ മനസ്സമാധാനം പോലും കവർന്നെടുക്കുന്നുണ്ട്.

സോഷ്യൽ മീഡിയ ഒരു കത്തി പോലെയാണ്. അത് വെച്ച് നമുക്ക് പഴം മുറിക്കാം, കൈയും മുറിക്കാം.. തെറ്റ് കത്തിയുടേതല്ല; അത് ഉപയോഗിക്കുന്ന മനുഷ്യന്റേതാണ്.
അതുപോലെ സോഷ്യൽ മീഡിയയും.
 അത് വിദ്യാഭ്യാസത്തിനും നന്മയ്ക്കും ഉപയോഗിച്ചാൽ അനുഗ്രഹമാണ്. എന്നാൽ തെറ്റായ രീതിയിൽ ഉപയോഗിച്ചാൽ അത് ജീവിതത്തെ ബാധിക്കുന്ന ഒരു ഭാരമായി മാറും.

ഇന്ന് നമുക്ക് ആയിരക്കണക്കിന് "ഫോളോവേഴ്സ്" ഉണ്ടായേക്കാം. പക്ഷേ മനസ്സ് തുറന്ന് സംസാരിക്കാൻ എത്ര യഥാർത്ഥ സുഹൃത്തുക്കൾ ഉണ്ട്? നൂറുകണക്കിന് ലൈക്കുകൾ ലഭിച്ചേക്കാം. എന്നാൽ നമ്മെ ആത്മാർത്ഥമായി സ്നേഹിക്കുന്ന എത്ര പേരുണ്ട്?
അതിനാൽ ചോദിക്കേണ്ട ചോദ്യം ഇതാണ്:
"ഞാൻ സോഷ്യൽ മീഡിയയിൽ എത്ര സമയം ചെലവഴിച്ചു?" എന്നതല്ല, "ആ സമയം എന്റെ ജീവിതത്തിന് എന്ത് മൂല്യം നൽകി?" എന്നതാണ്.

നമുക്ക് സാങ്കേതികവിദ്യയെ തള്ളിക്കളയേണ്ടതില്ല. മറിച്ച് അത് വിവേകത്തോടെയും ഉത്തരവാദിത്തത്തോടെയും ഉപയോഗിക്കണം.നമ്മൾ ഇടുന്ന ഒരു പോസ്റ്റ് അല്ലെങ്കിൽ കമന്റ് നമ്മൾ മരിച്ചാലും അവിടെയുണ്ടാകും. അത് നമുക്ക് 'സദഖത്തുൻ ജാരിറ' (തുടർന്നു കിട്ടുന്ന പുണ്യം) ആകണോ അതോ പാപമാകണോ എന്ന് ചിന്തിക്കുക.
 കാരണം ഒരു ഉപകരണം നമ്മുടെ കൈകളിലായിരിക്കണം; നമ്മുടെ ജീവിതം അതിന്റെ കൈകളിലാകരുത്.

ഇനി സമയ പ്രാധാന്യം എടുത്ത് നോക്കികഴിഞ്ഞാൽ...ഒരു ദിവസം നമുക്ക് ലഭിക്കുന്നത് 24 മണിക്കൂറാണ്. അതിൽ എത്ര സമയം നാം പഠനത്തിനും കുടുംബത്തിനും അല്ലാഹുവിന്റെ ആരാധനയ്ക്കും ചെലവഴിക്കുന്നു? എത്ര സമയം മൊബൈൽ ഫോണിൽ ചെലവഴിക്കുന്നു? ഒരു മണിക്കൂർ റീൽസ് കാണാൻ തുടങ്ങുന്ന നാം, സമയം എങ്ങനെ കടന്നുപോയെന്ന് പോലും അറിയാറില്ല. നഷ്ടപ്പെട്ട പണം തിരികെ നേടാം. എന്നാൽ നഷ്ടപ്പെട്ട സമയം ഒരിക്കലും തിരികെ ലഭിക്കില്ല.വേറെ ഒരു രീതിയിൽ നോക്കിയാൽ..നിങ്ങളുടെ മൊബൈൽ ഫോണിന്റെ ബാറ്ററി 5% ആയാൽ നിങ്ങൾ ഉടനെ ചാർജ് ചെയ്യാൻ ശ്രമിക്കും. പക്ഷേ നമ്മുടെ ജീവിതത്തിന്റെ 'ബാറ്ററി'യായ സമയം ഓരോ നിമിഷവും കുറഞ്ഞുകൊണ്ടിരിക്കുകയാണ്. അത് തിരികെ ചാർജ് ചെയ്യാൻ കഴിയുമോ? കഴിയില്ല. അതുകൊണ്ടാണ് സമയത്തിന് ഇത്രയും വില.

ഖുർആനിൽ അള്ളാഹു ഇങ്ങനെ പറയുന്നു.
وَٱلْعَصْرِ= കാലം തന്നെ യാണ് സത്യം 

إِنَّ ٱلْإِنسَـٰنَ لَفِى خُسْرٍ﴿٢﴾=നിശ്ചയമായും, മനുഷ്യന്‍ നഷ്ടത്തില്‍ തന്നെയാണ് 

إِلَّا ٱلَّذِينَ ءَامَنُوا۟ وَعَمِلُوا۟ ٱلصَّـٰلِحَـٰتِ وَتَوَاصَوْا۟ بِٱلْحَقِّ وَتَوَاصَوْا۟ بِٱلصَّبْرِ﴿٣﴾=വിശ്വസിക്കുകയും, സല്‍ക്കര്‍മങ്ങള്‍ പ്രവര്‍ത്തിക്കുകയും യഥാര്‍ത്ഥത്തെ കുറിച്ചു അന്യോന്യം "ഒസിയ്യത്ത്" (ബലമായ ഉപദേശം) ചെയ്യുകയും, ക്ഷമയെക്കുറിച്ചു ബലമായ ഉപദേശംചെയ്തരൊഴികെ.

സോഷ്യൽ മീഡിയയിൽ മണിക്കൂറുകൾ ചെലവഴിക്കുന്ന നാം, അല്ലാഹു സത്യം ചെയ്ത് പറഞ്ഞ ഈ സമയത്തെ എത്രമാത്രം വിലമതിക്കുന്നുവെന്ന് സ്വയം ചോദിക്കണം.

രണ്ടാമതായി 
വാർത്തകൾ പരിശോധിക്കണം... ഖുർആനിൽ സൂറത്തുൽ ഹുജറാത്തിൽ അള്ളാഹു പറയുന്നു..
يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا...
അർത്ഥം: വിശ്വസിച്ചവരേ! ഒരു ദുർമാർഗ്ഗി നിങ്ങൾക്ക് ഒരു വാർത്ത കൊണ്ടുവന്നാൽ അത് പരിശോധിക്കുക. അല്ലാത്തപക്ഷം അറിയാതെ ഒരു ജനവിഭാഗത്തിന് നിങ്ങൾ ദോഷം ചെയ്യുകയും പിന്നീട് ഖേദിക്കുകയും ചെയ്യും.
ഇന്ന് സോഷ്യൽ മീഡിയയിൽ വ്യാജവാർത്തകൾ അതിവേഗം പ്രചരിക്കുന്നു. ഖുർആൻ നമ്മെ ആദ്യം പഠിപ്പിക്കുന്നത് – പരിശോധിക്കാതെ ഒരു വാർത്തയും പ്രചരിപ്പിക്കരുത് എന്നതാണ്. 

മൂന്നാമതായി
നമ്മുടെ ഓരോ വാക്കും രേഖ പെടുത്തപെടുന്നു...
അള്ളാഹു സൂറത്തുൽ ഖാഫിൽ പറയുന്നു 
مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ
അർത്ഥം: മനുഷ്യൻ ഉച്ചരിക്കുന്ന ഒരു വാക്കുപോലും രേഖപ്പെടുത്താൻ സന്നദ്ധരായ മലക്കുകൾ അവന്റെ സമീപത്തുണ്ട്.

ഇന്ന് നമ്മുടെ നാവ് മാത്രമല്ല, നമ്മുടെ വിരലുകളും സംസാരിക്കുന്നു. നാം ടൈപ്പ് ചെയ്യുന്ന ഓരോ കമന്റും അല്ലാഹുവിന്റെ അറിവിലുണ്ട്.

നാലാമതായി 
അനാവശ്യ കാര്യങ്ങൾ ഒഴിവാക്കുക
സൂറത്തുൽ മുഅമിന്നൂനിൽ അള്ളാഹു ഇങ്ങനെ പറഞ്ഞു വെക്കുന്നുണ്ട്.
وَالَّذِينَ هُمْ عَنِ اللَّغْوِ مُعْرِضُونَ
അർത്ഥം: അനാവശ്യവും പ്രയോജനമില്ലാത്തതുമായ കാര്യങ്ങളിൽ നിന്ന് വിട്ടുനിൽക്കുന്നവരാണ് യഥാർത്ഥ വിശ്വാസികൾ.
 മണിക്കൂറുകളോളം ലക്ഷ്യമില്ലാതെ റീലുകൾ കാണുന്നതും പ്രയോജനമില്ലാത്ത ചർച്ചകളിൽ മുഴുകുന്നതും ഈ ആയത്തിന്റെ വെളിച്ചത്തിൽ നാം വിലയിരുത്തണം. 

അഞ്ചാമതായി ഞാൻ നിങ്ങളെ ഉണർത്തുന്നത് നോട്ടം സംരക്ഷിക്കുക.
സൂറത്തുൻ നൂർ (24:30)
قُل لِّلْمُؤْمِنِينَ يَغُضُّوا مِنْ أَبْصَارِهِمْ...
അർത്ഥം: വിശ്വാസികളായ പുരുഷന്മാരോട് പറയുക: അവർ അവരുടെ നോട്ടം താഴ്ത്തുകയും അവരുടെ പവിത്രത കാത്തുസൂക്ഷിക്കുകയും ചെയ്യട്ടെ.

സോഷ്യൽ മീഡിയയിൽ നാം കാണുന്നതും അല്ലാഹുവിന്റെ മുന്നിൽ ഉത്തരവാദിത്തമാണ്.ഇനി ഞമ്മൾ ചിന്തിക്കുക 

"സോഷ്യൽ മീഡിയ ഒരു പരീക്ഷണമാണ്. അത് ഉപയോഗിച്ച് നാം സ്വർഗത്തിലേക്കുള്ള സൽകർമ്മങ്ങൾ സമ്പാദിക്കാനും കഴിയും; അല്ലെങ്കിൽ പാപങ്ങൾ സമ്പാദിക്കാനും കഴിയും. അതിനാൽ ഓരോ പോസ്റ്റ് ചെയ്യുന്നതിന് മുമ്പും, ഓരോ കമന്റ് എഴുതുന്നതിന് മുമ്പും, ഓരോ വീഡിയോ കാണുന്നതിന് മുമ്പും നമ്മൾ സ്വയം ചോദിക്കണം: 'ഇത് അല്ലാഹു ഇഷ്ട്ടപെടുന്ന കാര്യമായിരിക്കുമോഎന്ന്? ഉത്തരം "അതെ" ആണെങ്കിൽ മുന്നോട്ട് പോകാം.

"അല്ല" ആണെങ്കിൽ, ആ ഒരു നിമിഷം തന്നെ നമ്മെ പല തെറ്റുകളിൽ നിന്നും രക്ഷിച്ചേക്കാം.

Social media is a good servant but a bad master
"സോഷ്യൽ മീഡിയ ഒരു മികച്ച ദാസനാണ്, പക്ഷേ വളരെ മോശം യജമാനനുമാണ്."
മൊബൈൽ ഫോണിന്റെ സ്ക്രീൻ ഒരുദിവസം ഓഫ് ആകും. പക്ഷേ നമ്മുടെ പ്രവർത്തനങ്ങളുടെ രേഖ ഒരിക്കലും നഷ്ടമാകില്ല. അതിനാൽ, ഓരോ ക്ലിക്കും അല്ലാഹുവിന്റെ തൃപ്തിയിലേക്ക് നയിക്കുന്നതാകട്ടെ.

 ഞാൻ ഒരു ചോദ്യം ചോദിക്കട്ടെ.
ഇന്ന് രാത്രി അല്ലാഹു നമ്മുടെ മൊബൈൽ ഫോണിന്റെ ചിത്രമല്ല... നമ്മുടെ ജീവിതത്തിന്റെ ചിത്രമാണ് തുറന്ന് കാണിക്കുന്നതെങ്കിൽ...

 നമുക്ക് സന്തോഷത്തോടെ അത് നോക്കാൻ കഴിയുമോ?
നാം എത്ര നമസ്കാരങ്ങൾ കാത്തുസൂക്ഷിച്ചു എന്നതും രേഖപ്പെടുത്തപ്പെട്ടിട്ടുണ്ട്.
എത്ര ഖുർആൻ വായിച്ചു എന്നതും രേഖപ്പെടുത്തപ്പെട്ടിട്ടുണ്ട്.
അതുപോലെ എത്ര മണിക്കൂർ അനാവശ്യമായി സോഷ്യൽ മീഡിയയിൽ ചെലവഴിച്ചു എന്നതും അല്ലാഹുവിന് അറിയാം.. അള്ളാഹു ഖുർആനിൽ 50-ാം അധ്യായത്തിൽ 18-ാം സൂക്തത്തിൽ ഇങ്ങനെ പറയുന്നു :മനുഷ്യൻ പറയുന്ന ഏത് വാക്കും നിരീക്ഷിക്കാൻ അവന്റെ അടുത്ത് ഒരു കാവൽക്കാരൻ ഉണ്ടാകാതിരിക്കില്ല.
അല്ലാഹു നമ്മുടെ സമയത്തെ ബറകത്തുള്ളതാക്കുകയും, നമ്മുടെ കണ്ണുകളെയും നാവിനെയും വിരലുകളെയും നന്മയിൽ മാത്രം ഉപയോഗിക്കാൻ തൗഫീഖ് നൽകുകയും ചെയ്യട്ടെ..

AUTHOR:RINSHA JEBIN 
CLASS :ILS 2
COLLEGE :GREEN VALLEY WOMENS ACADEMY MANJERI