സ്വപ്നം

വർണ്ണ വെഞ്ചാമരം വീശി മന്ദം
സ്വപ്നം സുഖാനന്ദ മേകിടുന്നു
സ്വർണ്ണപ്രഭ ചൊരിഞ്ഞെത്തി നമ്മിൽ
സ്വർഗ്ഗാനുഭൂതി തരുന്നു മന്ദം
വർണ്ണ ചിത്രങ്ങൾക്കു മാറ്റുകൂട്ടും
ഭാവനാ ലോകത്തേയ്ക്കാനയിപ്പൂ
വാരിവിതറിയ പൊൻ പ്രഭ പോൽ
മാനസം കോൾമയിർ കൊണ്ടീടവേ
ആനന്ദ നിർവൃതിയാൽ മനസ്
മായികാലോകത്ത് നൃത്തം വെയ്പ്പൂ
ചാരുതയാർന്ന് മനം കവർന്നാ
ദൃശ്യ മാധുര്യത്തിൻ തേൻ നുകരാൻ
പാലൊളി തൂവുന്ന തിങ്കളെ പോൽ
സ്വപ്നം പ്രഭ ചൊരിഞ്ഞെത്തിടുന്നു
മങ്ങി തുടങ്ങിയ ജീവിതത്തിൽ
വർണ്ണ സൗരഭ്യം പടർത്തിടുന്നു
                                  by
                          ശ്രീജ. ടി പി